Rajasthan CM tur chu la tihchian tur ti

Rajasthan a party hotu lawk tur chu MLA thlan leh Congress high command ten an la ngaihtuah ang tiin senior Congress leader Sachin Pilot chuan a sawi a. Hei hi Chief Minster post a elpui ber Ashok Gehlot an a chelh mek chungchanga an zawhna a chhanna a ni a.
Gehlot leh Pilot camp te intihbuaina avang hian kum 2020 khan Rajasthan-a Congress sorkar chu a tluchhe lo chauh hman a ni.
Inthlan hmain party inlungrualna lam hawia chetlakna an neih lai pawhin boruak a awm hat hat reng a. A hma lawk pawhin Gehlot chuan Chief Minister post chu bansan a duha mahse ‘he post hian min chhuahsan duh lo’ tiin a sawi.
Congress an inlungrual em tia zawhna chu Pilot chuan, “Congress kan inlungrual a. BJP te zawk lungrual ;lo leh uai an ni. Ticket pawh dik lo takin an sem darh a. Congress-ah chuan kan thukhawma kan sawiho a ni,” tiin a sawi.
Congress chief Mallikarjun Kharge leh party leader Rahul Gandhi te chuan ‘ngaidama, theihnghilha, hma lam pan’ tura an hrilh thu Pilot chuan a sawi bawk a. “Chuvang chuan a nia hma lam hun ka thlir ni. Rajasthan tan kum nga roadmap ka thlir a. |angrualin, Congress kan chak ang. Chumi hnuah MLA leh hotute chuan chet zel dan tur an la rel mai ang,” tiin a sawi bawk a. Rajasthan hi November 25 ah an inthlang dawn a ni.
Kumin inthlan chu kum 2018 nen a danglamna zawhna pawh Pilot chuan khatih hun lai kha chuan Congress te chu Opposition an ni a ti bawk a. “Tun tumah chuan mipui te kum nga chhunga kan hnathawh an hmu a, thingtlang khuaah hmasawnna kan thlen a. He inthlan hi chhinchhiahtlak a ni dawn a, Congress te chuan thuneihna kan chang leh ang,” tiin a sawi bawk.
Rajasthan politics chu Independence hnuah kum sawm li vel zet Congress in a thunun a ni a. Mahse, kum 1990 khan BJP ten chakna an chan hnuah rorel lai party tling nawn leh an awm ngai ta lo. Chumi thlirna ang chuan Congress te chu tla mai thei tura ngaih theihna a awm ve tho thung.
Chu mai bakah a constituency Tonk-ah chuan Congress MLA thlan tlin nawnin an awm ngai miah lo bawk a. Mahse, Pilot chuan, “Independence hnuah Tonk-ah vote 50,000 chuangin tumah an chak ngai lo. Record te chu siam a ni a, thaichhiatin a awm bawk thin a, number sawi ka duh lo. Mahse, mipui ten min ring a. Hmasawnna hna nasa takin kan thawk a, Covid-19 lai pawhin kan pui nasa bawk a. Kumin hian tum dang zawng aiin Tonk-ah hnehna kan chan san ka ring,” tiin a sawi bawk.