Rajya Sabha-in CEC, EC te thlanna tur bill pawm fel

Rajya Sabha chuan Chief Election Commissioner and Other Election Commissioners (Appointment, Conditions of Service and Term of Office) Bill, nakina Chief Election Commissioner (CEC) leh Election Commissioners (EC) te ruatna tur chu a pawm fel ta.
CEC leh EC te thlanah Supreme Court chu inhnamhnawih thei lova siam a ni tia Opposition te puhna chu chhangin Union Law Minister Arjun Ram Meghwal chuan Bill chu Supreme Court thurawn anga kalpui zawk a ni a ti a. Meghwal chuan tun thlengin appointment siamah dan tlawhchhan a awm lo va, he Bill hian a siam dawn ta chiaha langtlang takin engkim kalpui a ni awk ang a ti.
Law Minister chuan 1991 Act chuan CEC leh EC te ruatnaah clause a nei lo a ti a. Commissioner tur chu sorkarin a thlang tawp mai a, tunah chuan search and selection commitee awm tawh dawnin an en fel tawh ang a ti bawk a. “CEC leh ECs te humna tur legal proceeding a awm tawh dawn a ni,” tiin a sawi.
CECs hlui te atanga rawtna te pawmin Centre chuan official amendment pahnih siamin Supreme Court judge te hlawh leh hamthatna milin CEC leh ECs protocol a siam a ni.
Opposition te chuan Bill hi select committee-ah lut phawt se tia an rawt chu house chuan a hnawl bawk a.
Opposition te chuan Centre thil tumah zawhna neiin Congress general secretary Randeep Singh Surkewala chuan Bill hian Constitution of India a bawhchhia tiin a sawi a.
“Election Commission thuneihna chu Executive hnuaiah dahin Supreme Court thuremna siam te dik lo takin a hnawl a, he dan hi naupiang tir ang lek a ni,” a ti a, “Independent appointment mechanism kalpui ni se chuan thleibik neihna a awm thei dawn lo va, chutak chu sorkarin a hlauh ber a ni bawk si. Sorkar hian independent Election Commission, CEC leh EC an duh lo. An duh dan dana an tihtheih an duh,” tiin Surjewala chuan a sawi bawk.