RALTLAN CHU TUTE NGE?

Rev. Dr. Zaichhâwna Hlâwndo
Zofaten tunlaia kan hman lar êm êm tawngkam ‘ RALTLAN’ tih hian hun engemaw chhung chu ka thinlungah min helhkam a. A tawngkam RALTLAN tih awmzia chu sawifiah duah ngai lovin kan hre mai awm e. Ral hlauh avanga sa himna zawnga tlanchhia tihna mai a ni. Sap tawng chuan refugee tih hman a ni thin. Engatinge he tawngkam hi a lo lar tak êm êm? RALTLAN kan tihte chu tute nge? Eng vanga RALTLAN nge an nih? Eng dinhmunah nge Zofate kan awm mek? Eng nge kan hmabakah hian thil thleng tur tih hi rilru fim taka kan ngaihtuah a ngai a ni.
Kum 2021 khan Thenzawlah Zofate Haw Runpui Hnam Inkhawmpui Thianghlim kan buatsaih a. COVID 19 hri len lai kha a ni. Zofate Pathian Biak Inpui hmunah Zofate Hnam Lungphun kan buatsaih a, he hnam Lungphunah hian hnam peng hrang 12 te – (1) Mara (2) Lai (3)Hmar (4) Lusei (5) Gangte (6) Guite (7) Ralte (8)Vaiphei (9) Paite (10) Chawngthu (11) Mivam leh (12) Kuki lungah Zo hnah thlak chipeng zawng zawngte hming ziak a ni. He hnam Lungphun hawnna urhsun tak hmang tur hian Zofate hnam peng aiawh 12 pawh kan kal kim. Hnam peng 12 Lungphunte chu hnam peng aiawh ten an hawng a. Chung hnam peng 12 leh chipeng hming ziak zawng zawngte chu thlahtu bul thuhmun Zova thlah Zofate kan nihna puanna leh nemnghehna kan nei. Zofate chu tuma awpbeh leh thendarh theih tawh loh turin Pathian tan ram leh hnamah kan inpumkhat tlat tawh tur thute kan puang bawk.
Kan hnam Zawlnei Pastor Suakchhawnan ‘Hnam lirpui a lo nghing a’ a lo tih kha a takin a lo thleng. Hnam Lungphun hawn lai leh hawn hnua hnam lirpui nghing chuan Zofate chenna khawvel a rawn sawi che ta luih luih mai. Min awpbettu hnam dang ten kan chungah zahngaihna tel miah lovin kut min thlak a. Myanmar Democracy sawrkar chu Sipai chakna hmanga namthluk a lo ni a. Chu buaina namen lo avang chuan kan thisen zawmpui unau tam takin nunna an chân a, in leh lo tam tak hal sak an ni a. An chenna ram atâna Pathian pekah pawh awm thei lovin an nunna chhanhimna atân Zofate Jerusalem lam Mizoramah an rawn haw khawm ruih ruih ta mai a ni. Manipur-a ralmuang taka awm thin Zofate kha Meitei Hindu ten thawklehkhatah an rawn bei phut a, a aia rapthlak leh indiriam dan dang a awm thei dawn em ni tih khawpin an chungah zahngaihna tel miah lovin kut an thlak a. Mangang thla barin an siam a, chhanhimna kulhpui Zofate Jerusalem lamah an rawn tlan khawm leh ta hum hum mai a ni. Bangladesh lama Zofate pawh chutiang bawk chuan ringlo Mosolman te kut tuarin nunna tam takin an chan a, in leh lote halsak an ni a, loh theih lovin Zofate Jerusalem lamah sa himna zawng an rawn tlan haw a ngai leh ta a ni.
Eng vanga heng thil hi lo thleng ta mai nge ni tih chhanna ka dawn ve chu -Kan hnam zawlnei Pastor Chhawna hnena Lalpan a lo hriattir ang khan ‘Hnam Lirpui a nghing ta a ni’ tih hi a ni. Kum tam tak bo tawh, mahni hnam nihna pawh hre tawh lo, hnam hrang ang maia lo awm darhte kha Lalpan min hruai khawm mek. Hnam hrui khat kan vawnna tur kawng a rawn hawng ta a ni. Kan chenna tura Lalpan ram min pek Zoram, ramri inpersan awm miah lo, British rorelna atanga then darh leh awp behte kha hnam khatah ram pakhatah Lalpan min siam leh tawh dawn a ni. Chuvang chuan tumah hi RALTLAN mikhual emaw ramdang mi kan awm lova HRUAIKHAWMin kan awm mai zawk a ni.
Zofate chenna ramri pawh chinfel mêk a ni a. He hun harsa leh khirh tak lo thleng mêk hi Zofate inpumkhatna atana hun rangkachak a ni tih hi kan hai palh ang tih ka hlau tak zet a ni. Lalpan kan chenna ram Zofate Kanan ram hi tuma tihbuai emaw chuhbuai theih tawh loh turin min chinfelsak a tum mek a, chu chu hmelma pa setana huat zawng a nih avangin keimahni leh keimahni min indo tir a tum tih hi kan hriat a ngai. Kei chuan kan unau in leh lo leh an chhungte nunna chan tam tak chhanhimna kulhpui Zofate Jerusalem-a lo haw khawmte hi RALTLAN tih atan ka phal lo, HRUAIKHAWM tih mai tur an ni.
Lalpa Pathianin Zoram Thar (New Zoland) din a tum thu Bible zawlnei leh kan hnam zawlneite hmanga a lo puan hi a takin kan tawng chho mek a. Hun thim takah kan lut tawh a, kan lut mek a, kan la lut zel lovang tih pawh a sawi theih loh. Chuvangin he thim piah lama khawvar engmawi tak lo lang tur lam thlir ila. Thima thil tihte paihin eng thuama kan inthuam a hun tak zet a ni. Hnam dang ten heti taka min nekchep lai leh harsatna thlipuiin min nuai lai hian i tangrual ang u khai. Tuma then darh emaw awpbeh leh theih tawh loh tura min din that tumtu kan Lalpa Isua Krista thawhpuitu ah tang tlat ang u. RALTLAN’ inti tawh lovin HRUAIKHAWM te inti tawh zawk ila, Pathian hmangaihna atanga hmangaihna chhuak – tiamchin emaw bituk chin awm lovin inhmangaih tawn zel ang u. Kan pi leh puten “Thih leh ruam khatah, dam leh tlang khatah” an lo tih thin kha. Sem sem dam dam ei bil thi thi ti chung zelin HRUAIKHAWMte hi i lo duat ang u. Tichuan Zoram Thar Kanan pawh kan lut tlang thei ngei ang.