Raltlan kirtirtute’n na takin sawisa

Tun hnaiah BSF te’n Mizorama tlanchhia raltlante an kirtir mai ni lovin kut an thlak a, anmahni ngaihventu pakhat pawh na takin an sawisa.
August ni 4, Chawlhni khan BSF te’n Lawngtlai district-a Kantuli khuaah raltlante leh anmahni khawngaiha chaw petu kut an thlak a, raltlante hi an kirtir bawk.
Raltlante chaw petu hi Zirsangliana (45), Chawngte P-a cheng a ni a, Kantuli daiah raltlan an awm a, riltamin an awm tih a hriatin chaw pe turin a kal a ni.
“Chakma-pain min hrilh a, in Mizopuite an awm a, eitur pawh an nei lo a, an khawngaithlak khawp mai tiin min hrilh a, eitur kengin ka kal ta a ni,” Zira chuan a ti.
Kantuli ram, khaw daiah raltlante nen chuan an intawng a, biscuit leh fruti te a pek bakah chaw te pawh an ei hman. Chutih lai chuan BSF te’n an rawn nang ta a, kut an thlak zui tih a sawi.
A sawi danin, ramhnuaia an sawisak hnuah khuaa an camp-ah an hruai a, ke-a kalpuiin kut an thlak zui a, camp-ah an sawisa leh ta a ni.
“Ka thi lo chauh a ni,” a ti a, “Min tihhlum an tum a ni ang ka ti,” a ti bawk.
Mau tiangin an vua a, chhuatah muttirin a kut leh ke an chelh a, an chil bawk tih a sawi a, “Ka luak thlengin ka harh a, chumi hnu chu ka hre tawh lo,” a ti.
Nikhawhrelova a awm hma hian raltlante pawh BSF hian an sawisa a, hei hi a hmuh ngei thu sawiin, nausen tih loh chu kut an thlak vek nia a hriat thu a sawi.
A hriat chinah naupang kum riat mi leh nausen thla hnih mi an awm a, pitar leh putar kum 70 mi ve ve an awm bawk. Naupang pawh an beng a, pitar leh putar pawh kut an thlak niin a sawi.
Kantuli atang hian a tukah Chhippui-a an camp-ah an hruai a, raltlante chin a hriat zui loh thu a sawi. Chhippui-ah hian BSF hotu pakhatin kut an thlak nasa tiin BSF te chu a lo hau nia a hriat thu a sawi a, Vasei-ah hruaiin police station-ah an kalpui a, chuta tang chuan Lawngtlai-ah an hruai tih a sawi.
Vasei atanga an chhuah dawn hian police te chu kal ve turin a ngen a, ‘In rawn kal ve loh chuan ka ngam tawh lo tiin ka ngen tawp a, kan rawn kal ve dawn alawm an ti a,’ tiin a sawi a, Lawngtlai hi Thawhtanni zanah an thleng a, damdawi inah an hruai tih a sawi. Khawvar hmain Vasei police station-ah an hruai let leh a, Thawhlehni chhunah thlengin, hemi ni vek hian Tuichawng lui-ah lawnga chuangin Chawngte P a pan nghal.
A sawi danin, a taksa a duk nasa a, a hnungzang, a malpui, a awm leh a mawngtam a na. A beng a fiah lo bawk.
“Kan unaute an ni a, tuihalin riltamin an awm tih ka hria a, Zopa takin anmahni pui turin ka kal ve tawp mai a ni,” a ti a, “Lehkhathiam ka ni lo a, hnam tan tih theih pawh ka nei lo a, kan unau riltamte puih kha ka tih ve theih tawkah ka ngai a,” a ti bawk.
A zia tawh a, a duk te pawh a reh telh telh tih a sawi a, mahse raltlante kha a khawngaih lutuk a, riltam chungin, chau takin, na tuar chungin an awm tih a hriatin a rilru a hrehawm tih sawiin, “Zanah mumangah ka la hmu a, ka khawngaih lutuk,” a ti.
Raltlante hi Bangladesh-a an khua an chhuahsan atangin chawlhkar thum velah Mizoram an lut nia a hriat thu a sawi.