Raltlan lut thar awm deuh reng

Myanmar a\anga raltlante luhna hmun ber pakhat Farkawn khuaah raltlan an lut thar deuh reng a, kum tira Camp Victoria beih hnuah mi 800 chuang an lut tawh tih thu dawn a ni. January thlaah khan Farkawn ep Myanmar lama awm, Chin National Army (CNA) te hmunpui Camp Victoria chu Myanmar sorkar sipaite’n indo thlawhna hmangin an bei a, hemi hnu hian Farkawnah hian raltlan 800 chuang an lut tawh tih thu dawn a ni.
Farkawna Village-Level Committees on Myammar Refugees (VLCMR) secretary T Lalrinpuia chuan January ni 10 inbeihna thlen hnuah mi 800 chuang an khuaa an luh tawh thu leh, tun thlengin lut thar an la awm thu te a sawi.
“Camp Victoria beih hnuah khan mi 800 chuang an rawn lut tawh a, lut thar hi an awm deuh reng a, ni tin an la awm tia sawi theih a ni. Ni tinin tlem te tea rawn lut hi an awm,” tiin The Aizawl Post a hrilh.
Camp Victoria chhehvela mite hi an la ralmuang lo a, a hma anga inbeih awm rih lo mah se camp velah hian indo thlawhna a thlawk thin a, an inbei leh ang tih hlauvin a chhehvel khuate hian an sahimna tur an zawng ve nia a lan thu a sawi.
Camp hnaih khua Farawn, Tlangpui, Tlanglo leh Hnahthial te bakah camp hnaiha awm lo, Thantlang leh Hakha te atangin Farkawn-a raltlan an awm tih a sawi a, amaherawhchu raltlante hi an che sawn ve reng a, mahni khaw lama kir leh te, rawn let leh te an ni nawk tih a sawi.
A hmain an khuaah hian raltlan sang bawr an awm sa thu leh, tunah 1812 tia an chhinchhiah thu a sawi a, chhinchhiah loh an awm nual tih an hriat thu a sawi bawk.