Raltlan puihna kawnga NGO pahnih thawh dan zirchiang
Raltlan puihna kawnga NGO
pahnih thawh dan zirchiang
Tlawmngai pawl CodNerc Mizoram leh Impulse NGO Network Shillong chuan sahimna zawnga Mizorama raltlante chhawmdawlna kawnga an hnathawh thlirlet leh zirchiangin minister B Lalchhanzova hoin Nilaini khan an thukhawm.
Impulse NGO Network state team lead, CodNerc chairman ni bawk C Lalmuanthanga report danin, raltlan chhungkua mi 500 hnenah thla 6 chhung ration pek a ni a.
2023 July-ah Champhai district tan damdawi in khum 100 leh damdawi in-in a mamawh hmanraw hrang hrang Chief Medical Officer office Champhai an pe.
Raltlan leh a lo dawngsawngtu khawtualmi tan thlai thar rang leh long term crop (orange & apple) chinna turin an tanpui a. Thar rang chi ah chhungkaw 190 tan ruahmanin, serthlum hi chhungkaw 38 families, apple hi chhungkaw 13 tan, a vaiin chhungkua 241 puiin, ram acre 317.5 ah thlai/thei hi chin a ni.
Impulse NGO Network chairman Tashi Rapten Barfungpa chuan Agriculture leh Horticulture department bakah ATMA (Agriculture Technology Management Agency) puihna an dawn vangin lawmthu a sawi a. Mizoram sawrkar department leh NGO nena an thawhhona chu entawntlak a tih thu sawiin, Sikkim lamah pawh hei hi entawn ve theih nise a duhthu a sawi a ni.
Horticulture addl director L Lalhmingmawia chuan thingtlang khaw hrang hranga Impulse NGO Network leh Mizorama an state partner CodNerc ten sawrkar department-te nen tanghoa hma an lakna avangin thinglang loneituten thlai thar tam tak an thar chhuah bakah an hralh thei chu lawmawm a tih thu a sawi a. Hun lo awm zel turah pawh hetianga thawk ho zel turin an inhawng tih a sawi a ni.
Minister B Lalchhanzova chuan Mizoramah sawrkar leh NGO te thawhhona nasa zawk neih a la tul tih sawiin, “Mipui thleng phak tak tak tura hmalaknaah NGO-ten sawrkar tha nasa takin an tichak thei a. Sawrkarin NGO-te a thawhpui thiam a, NGO lam pawhin sawrkar puih duhna rilru pu chunga department-te nen thawhho theihna kawng dap thiam a ngai,” a ti.
Raltlante leh anmahni lo chhawmdawltu khuate tanpuina tur project chu a hoa bul tan a nih dan sawiin, a hlawhtlinna leh nghawng tha a neihte thlirlet theih a ni ta chu lawmawm a tih thu a sawi bawk.