Raltlan tharte kir leh deuh vek tawh

Tun hnaiah Mizoram dep Myanmar lam an buai avangin Mizoramah raltlan engemaw zat an lut thar a, mahse an ralmuan tak deuh avangin an kir leh deuh vek tawh tih thu dawn a ni.November ni ni 12 leh a tuk nilengin Myanmar-a Khawmawi leh a chhehvelah Myanmar sorkar sipaite leh sipai sorkar paih tuma beitute an inkap a, Mizoramah raltlan an pung nghal.
Khawmawi leh a chhehvel khuate hi Champhai district-a Zokhawthar depa awm an ni a, Zokhawthar leh Bulfek velah November ni 12 vel atang hian raltlan an pung ta a ni.
Raltlan luh nasatna Zokhawtharah chuan raltlan lut thar hi mi 4000 chuang an nih thu an VC president Lalmuanpuia’n The Aizawl Post a hrilh a, chhungkaw 900 vel, mi 4000 chuang tiin a sawi.
November ni 13 hnuah inkah a awm zui lo a, raltlan lut tharte hi an kir leh deuh mai tih a sawi a, mahse tun thleng hian tar leh nunau thenkhat chu mahni khuaa kir ni mah se zan lama Zokhawthar-a riak, a tuk chhuna mahni khuaa let leh thin an la awm tih a sawi.
Zokhawthar-ah hian raltlan awm sa mi 6500 vel an awm sa a, anni hi chu Zokhawthar bul hnai khua ni lo, a hla deuhva mite an ni.
November ni 12 leh ni 13-a sipai sorkar paih tumtute nena inkapte hi Rihkhawdar leh |iau vela duty Myanmar sipaite an ni a, a tawlh zawkah an tan avangin heng lai vela khua, Khawmawi, Rihkhawdar, Lianhna khaw thar, Haimual, Haimual khaw hlui, New Eden vel chu sipai sorkar paih tumtute kutah a awm zui rih.
Rihkhawdar-ah hian Myanmar sipai leh police an awm a, sipai hmun hi Chin Hills-a Myanmar sipai hmun hlun leh pawimawh a ni.
Inkah leh inbeih a awm zui rih lo a, Myanmar atanga raltlan a huhova lut thar an awm zui rih lo tih thu dawn a ni.