Raltlante ral do tura in haw a ngai CM thusawi vangin harsatna tawk – K Vanlalvena

Raltlante ral do tura in haw a ngai
CM thusawi vangin harsatna tawk
– K Vanlalvena
Burma leh Manipur buaina avanga Mizorama raltlante chu ram chhana ral do tura an haw a ngai tih MP K Vanlalvena chuan a sawi. Chief minister Lalduhoma thusawi vangin Zofate tan pawh Mizorama luh a harsat phah niin a sawi bawk.
Zirtawpnia MNF office-a inkhawmah MNF adviser ni bawk K Vanlalvena chuan, kum 2021-ah Burma a buai a, kan unau mi sing 5 vel an rawn tlan thla tih a. A tirah Mizoram-in ei tur a pe a, kum hnih thum a vei chuan kan ti thei ta loa, India sawrkar lahin an kar khat ei bak a pe thei loa, heng kan unaute hian ei tur an dap ve a ngai, hna an thawh a ngai a, kan ngaih theih a ngai ve bawk tih a sawi.
Chutih rualin Mizoram let thum vela lian Chin state-ah mipui nuai 5 vel bak an awm tawh lo a, an tlan darh nasa tih sawiin, “Aizawl, Lunglei leh Champhai khawpuiah Chin nula tlangval an tam lutuk. Ral do turin an haw a ngai. Chin state khi kan ram kan ti a nih chuan Burma sipai do turin haw rawh u! Tanpui in ngaihna apiangah kan rawn tanpui ang che u,” a ti.
Manipura kan unaute pawh, kan ram tia kan chhal chin humhalh zel kan duh chuan an raltlanna ata kir tura ngenin, ram chhan turin haw a ngai tih a sawi. Zohnahthlak chi leh chi indo sima lungrualna nen ral do turin a fuih bawk.
Assembly Ssession-a chief minister-in Uniform Civil Code (UCC) chungchangah thu belhchian dawl lo a sawi tih Rajya Sabha MP hian sawiin, “UCC hi an tih lai pawh khan a do nasa ber kan ni, Pu Duhoma khan a ti a. Parliament House-ah UCC kan la sawiho ngai miah lo. ‘Kan aiawha awmten an do si loa, vote an pe niin kan hria,’ a tihte kha dawt hulhual a ni. UCC bill hi Parliament-ah put luh a la ni ngai loa, vote lak a la ni ngai lo. He thu hi a hma pawhin Pu Duhoma hian a lo sawi tawh a. ‘A rukin an ti a, Mizo mipui min rawn lo,’ a lo ti tawh bawk,” a ti.
Tunhnaiah foreign atanga Mizoram lokal tum mi 10 vel chu Delhi atanga thawn kir an ni a. Hengte hi Pu Duhoma thusawi vang niin K Vanlalvena hian a sawi. Ram danga Mizo unaute tan Mizorama lo luh a harsa em em tawh a, Mizoram Lok Sabha MP nen pawh harsatna tawkte an buaipui thin tih a sawi a ni.
“Pu Duhoma khan UK leh US atanga lokalte Burma ramah training pek an nih thu te, a then phei chu Ukraine indonaa tel angtein a sawi a nih kha. Hei vang hian Mizorama rawn luh tum kan unauten harsatna an tawk nasa hle. Kan ram kan hnam tana ke kan lo pen thinnaah Pu Duhoma hian pawi a khawih pawi hle a ni,” a ti.
Hnama chiang turin tawnga chian a pawimawh tih MNF hruaitu hian a sawi. “LADC-ah official-in Lai leh English an tih hi tha ka ti. Zoram chhungah Zofaten tawng hrang hrang kan hmang. Heng mite hian an pianpui tawng theuh an hmang a, Mizo kan tih hian Lusei tawng hmang chauh a huam lo. Pu Laldenga pawhin lungthu pathuma chaw chhum thinte hi ka fate an ni, a lo tih angin Zorama chengte keimahni vek tho kan ni,” a ti.
Mizoram leh hnam tana kal na ngam ber chu MNF a ni tih a sawi a. A ni pawhin sensitive area a tlawh kim vek tawh tih MP hian a sawi. Assam nena inrinaah kan kal huai a, kan ram kan zauh phah tih a sawi. Assam forest hnuaia awm – Chuhvel pawh MP fund-in a panna kawng an dawh a, Mizoram sawrkarin police camp a sa a, tun thlengin an luah tih a sawi bawk.
“Aitlang lama kawng kan laih, Pu Thena checkgate aiin Pu Zoramthanga gate km 2-in hma kan sawn, Assam ram chhunga in 200 vel ding ta te, sawi sen a ni lo. Hnam thila MNF sawrkar thiltih kha a tam lutuk. Ram leh hnam tana hma la nasa ber hi kan tho leh dawn,” a ti.