Ram buai avanga kan inhawnna hmangsualtute kan dim dawn lo – CYMA president

Thenawm ram Zofate awmnaa tualchhung buaina a awm avanga Mizoramin unaute tana lainatna a lo lantir chu hmangsualin ruihhlo tawlhna remchanga hmang an awm nia a lan thu Central YMA president Lalhmachhuana chuan a sawi a. Hetiang mite chu manchhuah an nih chuan YMA chuan a dim dawn lo tih a sawi.Central YMA hnuaia ruihhlo dotu, Kumpuan Sub Committee-in 2023 December 12 atanga kumin September 9 thlenga ruihhlo a man chu Thawhlehni khan a tichhia a. Tualchhunga an hralhna anga chhut chuan Rs. 5,58, 45,780 hu a ni.
Ruihhlo an man tam ber hi heroin a ni a, methamphetamine leh ganja bakah ruih nana hman chi damdawi tui leh mum chi hrang hrang a ni.
Central YMA president chuan, YMA-i ruihhlo do kum a puan tirh, kum 2004 chho ah khan heroin an man tam zawk hi a gram (hawng) in a ni a, 2021 hnulamah erawh a kilogram-a man tur a tam tawh hle a, thenawm ram buai hnua lo tuamhlawm ngaite Mizoramin a lo tuamhlawm hnu hian, misual thenkhatin remchanga la in ruihhlo tawlh hi a hluar zual em ni, tih theih a ni ta tih a sawi.
“Ruihhlo man a tam chuan supply rawn lut a tam tihna a ni. Kan lainatna a dik lo zawnga rawn hmang tangkaitu hi man chhuah an nih phawt chuan, YMA chuan lainatna tel loin kan bei dawn,” a ti.
Hausak thut duh vanga ruihhlo tawlh an awm bawk tih Lalhmachhuana hian sawiin, “Kan ramah hausak dan hriatchian loha hausa thut an awm chawk. Kan thalaite nunna thapa haisak tumte hi YMA chuan a ral thlir mai mai dawn lo, a do zel dawn,” a ti.
Central YMA hruaitute chuan nu leh pa zingah an fate ruihhlo ngai, an ruihna tur ngaihtuah sak a, hemia an hlawkna hmanga ruihhlo ngaihtuah sak zel tuma zuar thin pawh an awm tih an sawi a. Mizoram Synod-in Revival Team atangin ruihhlo ngai an mante hnena councelling an pek thin bakah 2023 April atang khan Synod Social Front chuan councellor (M.Th) an rawn dahsak thu an sawi.
CYMA Kumpuan Committee man khawm sa ruihhlo hi Synod moderator Rev Vanlalnghaka chuan CYMA office kawtah a tiral a, a tam zawk erawh mipui nawlpui hriselna atana pawi lo thei turin Phunchawngah CYMA hian a tiral a ni.

CYMA president thusawi dang:
atana man an nih chuan an license cancel sak nghal mai tura an ngai laiin, a ni thin lo fo. Two wheeler taxi-ah pawh ruihhlo home delivery ti tawk an awm tih sawiin, passenger phur lirtheite dinhmun hi thuneituten a khat tawkin an enfiah a tul hle.
8 Damdawi dawr hi kan mamawh a, veng tinah leh hmun kilkhawr deuha a tam lutuk ta erawh sawrkar thuneituten enfel a ngai. Dan dikloa damdwi ruih theih zawrhchhuahna titamtu a ni thei em tih ruihhlo kan man thinna atangin a hriat theih.
8 Biak in thleng phak tawh lo, khawlaia ualau taka chetla ngam ni si lo, mi nawlpuiin fel tak anga kan ngaih zingah ruihhlo a hluar a; kohhran, a bikin kohhran thalaiten biak in lam hawi tura an bana kaia an in luhchilh a ngai.
8 YMA huangchhunga tih theih loh, kohhran huangchhunga tih theih a awm a; sawrkar pawhin a kal dan ngai pet pet niloin ruihhlo do kawngah a force-te a hman nasat lehzual a ngai. Kan man nasat danah hian nasa zawka beih a ngai tih a chiang.