Ram dang lung inah Indian 10,152 tang mek

Ram dang lung inah Indian 10,152 tang mek
Indian sorkar chuan tunah hian ram dang lung inah Indian 10,152 tang an awm mek a, thenkhat hi an thubuai ngaihtuah lai mek an ni tih a sawi.
Minister of State for External Affairs Kirti Vardhan Singh-a’n Rajya Sabha-a ziaka zawhna a chhannaah United Arab Emirates (UAE)-ah Indian 25 chu thi tura hrem an nih thu leh tihhlum erawh an la ni lo tih a sawi.
Singh-a hian ram danga lung in tang, thi tura hremte nen a tar lang a. Sorkar chuan ram danga Indian awmte hi an himna tur leh an changkangnna tur a ngaihtuah reng tih a sawi a. Hemi atan hian palai pawh a tir nasa tih a sawi.
Ram hrang hrangah Indian-te hi thi tura hremna pek an awm nual tih Singh-a hian a tar lang a. UAE-a mi 25 bakah hian Saudi Arabia-ah 11, Malaysia-ah paruk, Kuwait-ah pathum leh Indonesia, Qatar, US leh Yemen-ah mi pakhat theuh an ni.
Indian sorkar chuan ram danga awm a mite thi tura hremte hi a ngaihven reng thin a, dan anga hremna khin let dan tur leh khawngaih dilna thlengin a buaipuisak thin tih Singh-a chuan a sawi.
“Indian Mission/Post-ten lung inah an tlawh a, court, lung leh public prosecutor leh agency dangte pawh a tul ang zelin a dawrsak thin,” a ti.
Kum nga liam ta chhunga ram danga Indian dan bawhchhia, thi tura hremte chungchang zawhna pawh Singh-a hian chhangin heng hi Malaysia, Kuwait, Qatar leh Saudi Arabia-ah a thleng niin a sawi.
Kum 2024 khan Kuwait leh Saudi Arabia-ah Indian pathum tihhlum niin Zimbabwe-ah pakhat tihhlum a ni a. Kum 2023 khan Kuwait leh Saudi Arabia-ah paruk tihhlum niin Malaysia-ah pakhat tihhlum a ni bawk.
UAE bikah chuan Singh-a hian sorkar atangin data an nei lo tih a sawi a, an hriat dan erawh chuan kum 2020 leh 2024 chhungin Indian tihhlum an awm lo tih a sawi a. “UAE-a thuneituten engmah min hrilh lo va, Kan mission pawhin a dawng lo va, kum 2020 leh 2024 inkarin Indian tihhlum an nei lo niin kan hria,” a ti.