By Mahmuaka Chhakchhuak
-- Advertisement --
HE RAM HI HMANGAIH RAWH U:
He ram, Mizoram hi nangni leh keini te hian kan ram neih chhun atana Pathianin min pek a ni. He ram hi kan thlah lo la awm zelte tan pawha kan ram neih chhun tur a ni bawk avangin vawiinnia Ram hruaitute hian hmangaih takin enkawl turin ka ngen a che u. He ram hian chhiat lam a pan zel emaw hmasawnna nei loa thenawm ramte’n min nek buai reng bawk a, ram chin humhalh lah chu kan harsat fu bawk si a, nakin lawkah chuan kan ram chin nia kan hriat te hi kan theawm hnamdangte hian min la chhuh lo ang tih pawh a sawi theih loh a, tunah pawh min chhuh tan chu a nih mek bawk hi. Heng mai bakah hian a chhunga chengte hi he rama lungawih tur hian min hnemin min thlamuan turin kan duh bawk che u a ni. Kan nu leh pate in nih ang ngei hian in mipuite tan hnemhnanawmin awm reng turin kan duh bawk a che u. Nangmahni tan chauh pawh ni loin in tu leh fate tan zel pawh he ram lo hi ‘Ka Ram’ tih tur a awm chuang dawn hauh loh avangin he ram hi nakin zela thang lo thar zel turte tan pawh chenna tlak ni turin in theihna hmang zel turin kan duh che u a ni. Chakma Autonomous District Council hial kan ram chhunga lo awm te saw nangni ram hruaitute hian a pawizia hriaa a thiah theihna atan hma la ngam awm ula kan fak ngei ang che u.
Kan ram chhung ngeia Chakma rawn ngampa lutuk te, kan ram chhung ngeia hnam dangin heti taka an rawn huangtau te hi a chhan kan hre vek lo nain nangni ram hruaitute chuan an ngampat theih lohna turin hma la ula kan duh a ni. Kan ram zimteah hian hnam dangte hian hmun leh ram lo neih belh tawh mawlh suh se. Assam nena kan inkar chin pawh hi ram leh hnam hmangaihna vang tal pawhin nangni ram hruaitute hian mipui thlamuanna tur talin hmalakna nei ula kan duh a. Ramria awm, kan unaute thlamuang taka an mut theihna tur in kawng awm ang angah te hmalakna neiin min ngaihtuahsak ula kan duh a ni.
RINAWMNA LEH DIKNA NUNPUIIN LANCHHUAH TIR FO RAWH U:
Ram hruaitu leh Eirukna tihte hi thangthar lehzualte hi chuan thil thuhmun ang hiala ngaih theih tawh turin kan tawngkamah kan hmang uarin kan sawi pawlh nasa ta hi thil pawi tak a ni. A takin ram hruaitu rinawm leh dik in nihna hi lantir ula kan duh che u a, in mimal nunah mai ni loin in chhungkaw khawsakna hmunah te ngei pawh ram hruaitu entawn tlak in nihna hi lantir ula kan duh che u a ni. Kan thenawm mai Bihar State te ngei pawh khati khawpin Laloo Prasad hruaina hnuaiah an hnungtawlh laiin Nitish Kumar Chief Minister alo nih hnu rei lo teah kan state aia chungnung daihin an rawn awm leh thei ta hi hruaitu fel leh ram hmangaih a nih vang kan ti lo thei lo ang. Nangni pawh hi kan ring tawk che u a, kan ring ngam bawk che u a ni. In hnen atanga Rinawmna te Dikna te hi hmuh fo kan duh a, party inbeihna leh au-hla chi hrang hranga inbeihnaah pawh hian in rinawm zia leh dikna nunpuitu in nihna te hi langchhuak zawk fo sela kan duh a ni. Chu chu Kristian rama hruaitu in nihna tur tak pawh a ni a, chu ngei chu ram leh hnam hmangaihtu tia kan rawn sawi fona tur che u a ni bawk ang.
SULHNU MAWI LEH |HA NEI NGEI ANG CHE U:
Kan Politician-te zingah sulhnu mawi leh tha nei an la tlem hle mai. Chutih laiin kan politician pension tawhte hi rethei tak an la awm lo em ni aw tih tur an ni thung. Anmahni demna lam erawh ni lo sela hetianga politics hi retheihpui ngam tak taka zuang lut kan la nei lo em ni tih hi zawhna pawimawh tak a ni thei awm e. Nangni, tun huna ram hruaitute chuan sulhnu tha tak nei turin kan duh che u a ni. Vawiin thlenga China mipuiin ‘Chairman Mao’ an la tih reng – Mao Zedong hnathawh ropui zia te, ‘Come, follow me, i have nothing to give you but blood, tear, toil and sweat’ tia Italian thalai a sing tel aukhawm theitu General Giuseppe zui tlak a nih a, a huaisenzia leh rintlak a nihna chhan te, Cuba Revolutionary Leader Fidel Castro-a’n a ram mipuite tana sulhnu ropui tak tak a hnutchhiah tam ziate leh thangtharte tana zir tur min hnutchhiah tamzia te, Vietnamese Revolutionary Ho Chi Minh hruaitu nih tlinzia te bakah Singapore hruaitu zinga hming dai tawh ngai lo tur Lee Kuan Win fakawm dante hi kan ram hruaitu ahte hian hmuh ve kan duh mai a ni lo a, anni ang hi hruaitu neih ve kan chak hliah hliah a ni.
Pathian tihna nen ram hruaina hna thawk ula, Aigupta bawih atan Israel fate hruai chhuaktu, Mosia Pathianin a awmpui ang khan nangni pawh Pathianin a awmpui ngei ang che u tih hi kan ring tlat a ni. Zam mai lo ula, chak tak leh huai takin ram tan hnathawk ula, mipuite tana zui tlak ni ngei turin hma hruai ula kan duh a ni. In tan in mipuite hian tawngtaia Pathian hnena dil hi kan hreh hauh lo a, kan ram enkawl leh hmasawnna kawnga hruaitute tana chawngheia tawngtaite hi kan thil chak zawng tak zawk a ni. Chuti chuan he ram hi Khawizu leh hnutetui luanna ram alo ni ang a, he ram ngeiah hian ram dangin pur an la rawn phur zawk ang a, he ram ngeiah hian Pathianin thuneihna a changin lalna a chang tawh zawk ang. Chumi niah ngei chuan nangni hmingtha taka ram hruaina hna thawktute hi chawimawiin in awm bawk ang a, mual lo liam tawhte pawh an thlan lungah thangtharte hian zahna chibai buk pahin pangpar kan la rawn dah ngei zawk ang.