By James Ramdinmawia
-- Advertisement --
Patling, kei ka ni inti ve siin Party Politics âtchilh a, ram leh hnam tâna hmasawnna tur lam aia tu emaw, Party hruaitu lawk deuh, MLA or Minister an nih ve tâk mìalin ti-a zui duan duan a, tute emaw ‘kid’-a in tang reng peih mai hi in fate an zak thin tih in hre lo em ni?
|halai lehkhathiam leh bright tak takin Politics in han zawm a, Neutral rilru leh thingtlang kuthnathawktu rilru atang chuan beiseina thar min petu, min tilawm veng vengtu in ni. Mahse nangni pawh hi Political System dik lo siam tha turin in lût emaw kan tih laiin, System awmsa dik lo tak chuan a lem zo che u a. Mahni Party chhunga thil dik lo te, Party hruaitute thutlukna dik lote siam tha tura pènchhuak ngam in awm miah lo. Pèn chhuah ahnêkin in Pute dik lohna thup bo tumin in hmanhlel a. Chutichuan ram leh hnam tan michenfâkawm ni turah in inngai ve leh ngawt a, bei in tidàwng.
Tuna kan Politician tam zawk, a Senior leh Junior deuh zingah hian mahni hmâ sial lo, hamthatna beisei lova ram tana inpè an awm nawk ang. Mahse chutiang mi chuan Principle nei taka Politics a zawm a, dik tak leh huai taka ram hmasawnna tur leh mipui hmâ ngâia a ngaihdan a sàwi fo chuan, kha a telna Party-ah khàn a tlatlum lo tial tial a. Ram siam tha turin dinhmun pawimawh a chelh thei ta thin lo a ni.
Thiltithei ni tur chuan dinhmun pawimawh chelh phâk a ngâi a, chutiang dinhmun pawimawh chelh phâk tur chuan sum nei sa tên tâwn nih emaw, sum nei lo pawhin Senior lo awmsate lung ti-àwi thei nih a ngai a ni. Hei tak hi kan buaina chu a ni. Chuvangin midik i nih a, ram i hmangaih bawk a, system awmsa i siam tha thei dawn lo a nih bawk chuan tuna kan Political Party neih sàte hi zàwm lo ngam rawh. Tu emaw, ram hmangaih lo, mahni hmasial, mi corrupt lutuk ‘kid’ mai mai atan inphal suh.
Tuna kan thalai Politician zingah Minister, MLA or Party Hotulu deuh zui thei, an kianga hun hmang tam thei, an in-a zanriah kil thei nih vel intihtheihpui an thahnem. Hetiang hi ni ve duh ila ni thei kan tam ang chu. Mahni ka’n insawi ve lawk teh ang; tuna kan Minister / MLA zingah hian (Sorkar hmasa pawh tìamin) thian ‘close’ tak ka nei ve nawk, anni pawhin an tana mi tangkài ka nih ve dawn phawt chuan min sìam len an hreh lo fur. Mahse retheih huamin ram leh hnam tân ka la Neutral fan a, an dik lohna-ah huai takin ka sawisel mai ang a, an thiltihthat-ah erawh lawmman beisei lovin ka fak ang. Chu chu ka tih thin dàn a ni.
Hawh u, retheih huamin ram leh hnam vei ila, ‘dik’ chu dik, ‘dik lo’ chu dik lo ti ngamin Politics pawh khèl ang u. Arvind Kejriwal-an Delhi CM a nih hnu-a Delhi a thlâk danglam nasatzia te, Laloo Prasad Yadav-a te chhungkua-in Bihar an sawp chhiat vek hnu-a India ram State hmasawn ber ni thei tura Bihar rawn tungding leh thei Nitish Kumar-a te hmalâkna te, hausakna thlahlel lo Tripura CM thin Manik Sarkar-a’n Tripura State a tihhausakzia te han thlir ila, an awhawm asin, mahse Kristian an ni ve hauh si lo. Mizoram Kristian Politician-te hian Krista Rilru pu chungin hna thawk se, tuna kan sàwilan tâkho aia ropui-ah hian Mizoram hi an hlângkai daih tawh ang. Mahse Mizoram chu a la rethei a, hmangaih taka enkawltu kan Politician-te erawh an hausa thur thur chu a nih si hi.
Minister, MLA, etc. te hi Voter-te avang chauha hetiang dinhmun thleng an ni. Chu’ng Voter-te chu tute’n nge hmìn kan tih chuan anmahni hmìntu chu Campaigner-te an ni. Campaigner-ho chu tute nge kan tih chuan, Unit, Block leh Party Headquarters-a hruaitute. Campaigner-te chuan mipui nawlpui hamthatna tiamin an campaign-pui, Candidate-te vote turin mipui an thlèm. An campaign-puite an han tling ta chiah a, mipuiin hamthatna an dàwn hmâ-in Candidate tling tà leh a Campaigner-te khan hamthatna an lo insem zo deuh vek hman. Mipuite kan harh a ngai. Hetiangho bàwl mai mai atan kan inphâl tawh tur a ni lo.
Party Worker, Campaigner-te pawh in harh a ngâi. Rim takin Party tan, in Candidate-te tan in thawk a. MLA Term khat chhungin in campaign-pui, MLA-a tling tate kha chu Crorepati an ni hman deuh vek. Nangni eng nge in nih ve? In zinga tlêmte khân Contract or Supply lian tham deuh an dawng hman ang a, a tam zawk kha chuan kum 5 chhungin Contract Nuai 20 man pawh in hmu hman lo ang. Chuti ni si eng vangin nge Campaign lai khan thenawmte nena inhmu sakhi khawpa tan in lo lâk ve chiam? In ât vàng. Mi ‘kid’-a tan reng kha zak ula, harh tawh teh u.
A tlângkawm nan, Party Politics hi âtchilh lo ila. Fîm takin thlîr ila. Inthlàn dawnah eng Party hian nge Manifesto nei tha, an Manifesto tipuitling thei turin an Candidate-te an tha tâwk em, CM atana an mi tawktarh hi a rinngam ang em, eng ang mi nge CM atan an tawktarh, an Flagship Programme-in ram hmasawnna a thlen thei tak tak ang em, etc. te thlîr chungin Vote thlâk ila. Khawtlang paràwn leh thalai lehkhathiam pawh Party mal tan leh Candidate mal tana phusa chiam lovin indah hlu thiam ila, chutianga kan tih phawt chuan tun atanga kum 10 lo awm leh turah chuan Mizoram hi State dangte awh khawpin kan kàng vah tawh ang a, thingtlang kuthnathawkte pawhin leirem an rap tawh ang.
I harhchhuak teh ang u!