Ram hruaitute leh thalaite…

Ram hmangaihna ‘nationalism’ leh ram tana thahnemngaihna ‘patriotism’ hi kan thalai lehkhathiamte hian an chai laih laih thin a, a thu hi chuan kan hria, kan sawi thei; a harsa leh buaithlak ta ber zawka chu, a taka kan thlen diktir thei lo thin hi a ni. Kan ram hruaituten thalaite an fuih a, ‘kan naktuk ram hruaitu turte in ni…’ an ti a. |hahnemngai taka ram leh hnam hmangaihna rilru pu chunga lehkha zir a, thiamna paw chhuak a, chu chu ram leh hnam tana hmang tangkai turin an fuih thin; a dik a, a tha bawk.
Ram hruaitute hian, thalaiten ram leh hnam hmangaihna rilru pu chunga ram tana hna an thawhna tur kawng an lo sial kuak ve phawt hi a tulna chin a awm ve a. Kan thalaite, lehkhathiam sang an ni emaw, lehkhathiam sang an ni lo emaw, an dinhmun mila hnathawh tur siam hi ram hruaitute tihtur a ni. Chutiang ngaihtuah lem loa ‘hna zawng rawh u’ tih liam ringawt hian ram ropui min thlen a rinawm loh a ni.
Tun dinhmunah, kan state hi a enga maha intodelh lo kan ni. Ram leh hnam humhalh kan sawi a, chumi atan chuan ‘intodelh’ a tul tiin kan sawi tlut tlut a, kan sawina a rei tawh.
Intodelh han tih hian, ei leh bara intodelh hi a kawk deuh a. Ei leh bara intodelh tur chuan, tuna kan kalphung pakhat, buh leh bal thlai chin hna, kum upa lam tawhte chauh thawh tur emaw kan tih hial tawh hi her danglam a, remhre zawk leh thahrui ngah zawk kan thalai hnathawh tur nei lova vei suau suaute thawnchhuah nan kan hman thiam hi a hun ve tawh. State dangah hna thawh tur zawng rawh u tih aiin, kan state chhung ram awl zau tak, leilung tha si hi thalaite kawhhmuhin, bul an tanna tur chhawpchhuahsak (facilitate) ila, ramhnuai lamah thalaite hi thawn bo zung zung ila, kar lovah kan intodelh em em ang.
Kan ram leilung thatzia hi kan sawina a rei tawh, mahse tun thlengin a nihna tur angin kan la hmang tangkai tawk tak tak lo. ‘Ram awl tha tak kan nei a, thawktu tur thalaite pawh kan nei tha, enge kan tlakchham? kan tih chuan thalaite kuta favah leh tuthlawh hmehbel a, ramhnuai lama thawn bo mai hi kan tlakchham chu a ni.