Ram leh hnam pawi an sawi tam avangin ZPM paihthlak an ngai – Zoramthanga

Ram leh hnam pawi an sawi tam
avangin ZPM paihthlak an ngai
– Zoramthanga
ZPM chuan ram leh hnam pawi an sawi nasat avangin state-ah leh LADC-ah paihthlak an ngai tih MNF hruaitu Zoramthanga chuan a sawi.
Lai Autonomous District Council (LADC) inthlanpui neih tura campaign-a kal MNF president Zoramthanga chuan, LADC inthlanpui awm tura an party candidate ruat thu ah Gen. Hqrs. leh Lawngtlai District Hqrs. thu a inhmu rem em em a, sawrkarna an chan ngei an beisei tih a sawi.
ZPM chu an sawrkar hnu ah kan airport neihchhun hralh an tum nghal a, thisen leh nunna tam tak senga neih, a bika Mizote inhumhimna, ram neitu nihna leh chumi chunga thuneihna kan neih – India Danpuia Article 371(G) chu awmze nei loah chhuahin kan ram tana pawi em em FCAA 2023 an pawm zui bawk a, ZPM sawrkarin kan ram chunga kan thuneihna an hlip vek niin a sawi.
“Autonomous District Council-ah pawh Article 371(G) bakah 6th Schedule hmanga inhumhimna thuahhnih kan neih kha awmze nei loah an chhuah a, central kutah pein kan thuneihna zawng zawng min chhuhsak a, hei hi ram leh hnam pawisawina a nih avangin, hei vang ringawt pawh hian state-ah leh LADC-ah ZPM paihthlak a ngai a ni,” a ti.
Dampa bial by election neih zawh takah pawh chief minister hoa thapui chhuahin, inzuar nasa hle mah se, Dampa bial mipuiin ZPM an hnawl a; tunhnaia inthlan apiangah mipuiin an buk tling zo tawh loa, paihthlak an ni ta zel tih Zoramthanga hian a sawi a ni.
Political party tam tak an ral tawh laiin, MNF chu political party ruhrel lian ber niin sawrkar leh mai tura ram mipui beisei mek an ni tih a sawi a. Ngun taka ngaihtuahna seng tura LADC mipui sawmin, MNF official candidate vote tling ngei turin a ngen tih a sawi.