Ram leilung chhe pha khawpinoil palm kan ching zau dawn lo
- Agriculture minister
Oil palm-in ram a tichhia nia sawi awm thin mah se, Mizorama oil palm chin beihpui thlak turah ram leilung tichhe tam khawpin chin tum a ni lo tih Agriculture minister PC Vanlalruata chuan a sawi.
Agriculture & Farmers Welfare department Lunglei District leh Patanjali Foods Ltd tangdun huaihawtin Lungleiah kum 2025– 2026 atana oil palm chin runpui, ‘Mega Oil Palm Plantation Drive 2025’ kalpui tur bul tanna leh hawnna chu Ningani khan hman a ni a. Agriculture & Farmers Welfare minister PC Vanlalruata hian hmanpuiin, Lunglei district-a Zau hrang hranga oil palm tiak chin tur sem chhuah tur a vailiam.
Minister chuan oil palm-in ram a tichhia nia sawi awm thin mah se, kuthnathawktute tana hlawk leh an nun khaw chhuahna tur a nih avangin sawrkar leh department-in a ngaipawimawh lo thei lo tih a sawi a. Mizorama oil palm chin theihna hmun chu Mizoram zau zawng atanga hmun zaa hmun 3 chauh a nih avangin ramin a chhiatpui khawpa hmalakna tur a awm lo tih a sawi.
Sawrkar laipuiin Mission hran liau liau dina hma a lakna a nih avangin oil palm chin chu a sual loh thu leh sum deh chhuahna tha tak a nih thu a sawi a. Kuthnathawktute chu tung leh oil palm chin danah mithiamten a kung inhlat zawng tur leh enkawl dan tur an sawi chu tha taka zawm turin a chah.
Patanjali Foods Ltd hian Lunglei district-a Kauchhuahah oil palm kui tiahna (nursery) neiin, tunah hian oil palm tiak nuai khat chuang an nei a. Hei hi ram hectare 712-a zaua chin theih tura ngaih a ni. Lunglei district-ah kum 2014– 2025 chhungin hectare 305-a zauah oil palm chin belh niin, a rah metric tonne 258 (quintal 2588) thar a ni. Kum 2025– 2026 chhungin hectare 196-a zauah oil palm phun thar leh tawh niin, a rah metric tonne 271 (quintal 2717) thar a ni tawh. Chhungkaw 340 hnen atangin oil palm hi lei a ni.
Darkar khata oil palm rah metric tonne 5 her thei tur factory chu Lawngtlai district-a Liaphaah bun tumin Patanjali Foods Ltd hian hma a la mek a, kum 2027-ah hawn hman beisei a ni.