Modi-a leh King inkawm, thing tuai a hlan
UK-a zin mek, Prime Minister Narendra Modi-a chuan Ningani khan Sandringham House-ah King Charles III a hmu.
An inkawmnaah Modi-a hian King hi Davidia involucrata ‘Sonoma’, Sonoma dove tree/handkerchief tree tia hriat lar tuai a hlan a. A thil pek hi prime minister-in ‘Ek Ped Maa Ke Naam’ a kalpui meka an nute puala thing phun tura a aupui mek kal zela a hlan a ni.
“Vawiin chawhnu hian King-in India Prime Minister Narendra Modi-a chu Sandringham House-ah a lo mikhual a. An inhmuhnaah hian His Majesty hi tun favanga a phun tur thing hlan a ni a, hei hi prime minister-in khuarel humhalh nana ‘Ek Ped Maa Ke Naam’ a hawna mipuite hnena an nute puala thing phun tura a chahna kal zela tih a ni,” tiin Royal Family chuan X-ah an tar lang.
Sonoma dove tree hi thing mawi tak, lian taka hnah nei, a hnah uai chu handkerchief emaw, parva emaw ang tak ni thei a ni a. Davidia involucrata pangngai ang ni lovin par tur hian kum 20 lai a mamawh a ni.
Indian Ministry External Affairs (MEA) thupuangtu, Randhir Jaiswal-a chuan Prime Minister Modi leh King Charles III inkawm hian ram pahnih inkar leh India-England inkungkaihna awm mek hrang hrang an sawi dun tih a sawi.
“Ayurveda, Yoga and Mission LIFE (Lifestyle For Environment) chawi kanna tur thil, UK-in a hlawkpui nghal theih turte pawh an sawi dun a ni,” tiin Jaiswal-a hian X-ah a tar lang.
Prime minister zin hian tih tur a ngahin a hun chep tak karah Sandringham House hi a tlawh a, Ningani chawhma khan UK Prime Minister Keir Starmer nen inkawmin India-UK free trade agreement (FTA) chu Buckinghamshire-a British Prime Minister’s official country residence, Chequers-ah an ziak nghe nghe.
“Chequers-ah hian Prime Minister Starmer nen hian economy lama India leh UK inkungkaihna tar lanna exhibition kan en dun a. CETA kan ziah nen hian kan inzawmna hi a letin a pung dawn a ni,” tiin Modi-a hian social media-ah a tar lang.
“Chequers-ah hian sumdawng hruaitute nen pawh kan inkawm a. India-UK CETA ziah a ni hian sumdawnna leh investment-ah huang thar a hawng dawn a. Eibara ram pahnih kan inkungkaihna hian bung thar a kai dawn a ni,” a ti bawk.
Buckinghamshire Street Cricket Hubs-a player-te nen pawh inkawmin Modi-a hian cricket hmanga ram pahnihte inkungkaihnate a sawi chhuak.
“Infiamnain ram pahniha mihringte a inpawhtir dan hmuh hi a nuam ka ti hle a. Ka thian thalaite hnenah hian T20 World Cup champion-a India player-te hming ziahna bat ka hlan bawk a ni,” a ti.
Cricket bakah Modi-a hian Premier League pawh sawi chhuakin football chu ‘India-a thalaite lawm a ni a, UK-a football club-te chu India-ah pawh a lar em em hlawm a ni’ tih a sawi.