Ram Nuam, Ram Nuam

Lalchhandama Colney
Ph – 9862982321

Kan thupui atang hi chuan khawi lai ram, TV, Youtube vela kan hmuh fo thin han sawi tur te pawh ang ka inti deuh. Ram nuam leh nuam lo hi engtin nge kan han teh ang aw, hel (terrorist) awm lohna, tui thianghlim, ei leh in tur tha hnianghnarna, inkalpawhna lam thatna, fai leh thianghlim, a dang pawh a tam thei ang. A mihring azirin a ni ve thei deuh bawk ang. Chenna in tha leh nuam tak te pawh hi a chhunga chengte an that loh chuan awmzia a awm chuang lo. Tlangram, hring dup karah rel an tlan nguai nguai a, kawngpui leh dai vel te pawh a fai, a thelh deuh hun bawk a. Heng, sap ram kan tih ang chi hote hi chu a nuam em em, lar pawh an lar thin reng a ni. Khawpui lun lutuk hi a awm ve leh bawk a, motor tlan te pawh zankhua, chhun zan zawm zata kal zut zut rengna hmun te pawh an awm bawk a. |henkhat chuan khawpui lun tak te hi nuam kan ti a, a thenin khaw fianrial, thiang, reh deuh raih lam hi nuam kan ti bawk a. Vawiina sawi ka han tum tak chu, hla phuahtuten, “Kan zotlang ram nuam hi chhawrpial run i iang e,” an lo tih, Mizoram, tlawh pawh tam vak loh, hmar chhak kilkhawr taka awm hi a ni.

Sik Leh Sa
Sapram kan tih, nuam tak, kal te pawh kan chak ve em emna thin te hi han thlir ve mah teh. BBC, CNN, te i thlir chuan, khaw lum zawng tehnaah chuan 40 degree celcius a pel chho daih tih te, a chang leh vawt uchuak, vur thli a tleh thut tih te. Khua a thal lutuk a, lui tui a tlem lutuk a, lawng pawh a kal thei lo, an din a ngai, hmun thenkhatah ve thung chuan ruah a sur nasa lutuk, tui lianin a ti buai hle, tih te. Ram vawt leh nuam tak ni thin te pawh kha vawiinah chuan a ni ta mang lo, sik leh sa inthlak danglam nasa, ramngaw tih chereu nasat lutuk vang a ni, an ti. Keini India ramte hi chu tun hma atangin a lum em em, ram lum ni sa a ni, ram khawpui ber N.Delhi-te phei chu an awhawm loh lutuk, boruak bawlhhlawh lutuk avang khuan zirna inte pawh ni tam tak tak an khar a ngai thin a ni. Keini chu a lum ber lai paw’n 34 degree celcius (Aizawl) vel, a vawh ber lai pawn 10 degree celcius (Aizawl) vel bawr a ni. Kumhlui thlah zan tih lohah hi chuan kan boruak pawh hi a thianghlim viau mai. Fur laiin lei a min duh deuh tih loh chu buaina em em kan la nei hran lo. Ram dangte chanchin atang hian kan fimkhur ve hle chu a ngai ang, tunah hrih chuan Khuanu zarah dam pangngai tan chuan a la nuam tawk hle mai.

Khawtlang Nun
Mizo sawrkar hnathawkte, mi tha lo, thatchhe awmkhawm ang hial deuh thawa han sawi duh mai te kan awm, a va zia lo em, (AIR-Azl: 23.12.2023, 7am), ka lo ti ve mai mai. Sawrkar hnathawkte kan hmu tuihnai lo viau mai thin hi chu, mahni pawh inen ve hlek a va ngai awm em ka lo ti ve mai mai bawk. Kan khawtlang nun nuam takah hian kan sawrkar hnathawkte hi kan hnuk/innghahna a la ni reng, tih hi i hria ang u. Hmeichhiate hlei hlei hi an pawimawhin an tangkai em em a ni. Covid hripui len lai khan kan nun, Mizo tak, lo lang te kha a va thlamuanthlak em! Chhung tin mai kan buai/harsa, chutih lai taka thilpek (A let leh phut awm lo) chawhmeh leh thil dang kan han inpe te kha a va ropui em, rei leh deuh tawh mah sela keimahni tho kha kan la ni. Vawiin kan khawtlang nunah pawh hian chhiatni, thatni-ah pawh, mi inhnuai chep taka cheng tan pawh kohhran hall, a thlawna hman tur a awm thei zel ta. Zurui buai hmuh tur pawh an awm meuh tawh lo, ruihhlo ngaiho erawh buaithlak deuh chang a awm. Faina kawngah pawh zokhaw lam hlei hlei an fai zawk, sap tawng, Mizo tawng ni lo, kan ngai hlu lutuk erawh a la buaithlak hle mai.

Zirna Lam
1980 chho vel lai kha chuan matric pass kha a hlu, a pawimawh vet vet khawp mai, hun a lo kal zel a, 1990 chho velah chuan graduate kha a lar leh viau mai. Vawiinah chuan thil a lo inthlak danglam, college, University, etc. result-te han en mah teh, an pass mai pawh a ni lo, 1st class, distinction, gold medallist, a ni nawk tawh mai. Tun hma, hnam dang lecturer deuh hlir awm thin pawh, PUC-ah tak ngial pawh hnam dang hmuh tur an awm tawh lo, thalai zingah pawh doctorate degree nei te pawh kan lo awm ve ta fer fur mai, Doctor, Engeneer, etc. te pawh Pathian zarah kan lo tam ve ta hle mai, a lawmawm hle mai. Master degree, graduate, tih vel te phei chu veng tin maiah hian an awm fer fur tawh mai a ni. Mizoten zirna kan ngaisang, kan fing hle mai, hma lam hun tur pawh a eng viau a tih theih ve ang. Zirna-in, training-na, leh a dang te pawh kan ngah ve ta viau mai, department leh hmun danga mite pawh Mizo mithiam-te an ni deuh zel tawh mai. Hetih lai hian sawi leh sawi hnu, kan lehkhathiamte, mithiamte, saptawng kan uar lutuk, Mizo tawngin a daih lo, kan han ti thla zen erawh hi chu ngaih a tha lo, kan tawngin ngaihhlut leh ngaihpawimawh a hlawh loh chuan sap tawng hian a chimral mai ang. Chutih hunah chuan hnam dangten min nuihzat mai ang, vai, kan tih ang chi ho hi chuan an thiam reng pawh hian an hmang tha duh mang tlat lo, an tawng kha an duh/ngaisang zawk. Ziak leh chhiar thiam pawh India ramah tam berna dawt kan ni, kan khaw hawi a zau ve viau mai le. Kan han sawi lan tak teah khan rinthu, sawi uar, etc., awm meuh lo tih min hmuh pui ve ka beisei. Hetih laia kan ziaa la ngaihmawhawm em em mai chu, zuk leh hmuam kan uar lutuk hi a ni. Zuk leh hmuam hian natna rapthlak, hlauhawm tak tak a thlen theih mai bakah kan ngaihtuahna/rilrute hi a ti fim lo a ni, eng emaw thil ah/hmanhmawh thilah pawh thutlukna tha, dik, neih a har, mi a ti chiang lo, fel lo thei tlat a ni. Nun hlim, hrisel, nei tur hian zu leh ruihhlo mai bakah zuk leh hmuam pawh hi kan hnualsuat a ngai, an tia lawm – thut mai mai leh meizuk hi a hlauhawm dan a inang reng, an ti, i pawm ve em, awm awl leh ei tui pawh hian zawi zawiin natna benvawn hlauhawm tak tak min thlen ve thei tho a ni. Kan hriselnate kan vawn that chuan kan lo hlim thei ang.Tichuan, mi sawi chhiat, rel, huatnate a lo tlem thei ang, chhungkaw kehchhiate pawh a lo tlem sawt mai thei asin.
Aw le, Mizote, Kristian vek kan ni, tawng khat kan hmang tlang bawk, a mi cheng 80% chuang lai chu Mizo kan la ni bawk. Vawiin thlengin boruak thianghlim tak hip tur kan la nei reng, ri bengchheng chungchangah pawh kan harh thar nasa hle, a dang pawh a tam mai a; ram nuam, ram nuam, a ni deuh ber mai e.