Ram pariat ten Amazon humhim tum

Amazon forest huam chhunga awm ram pariat te chuan inbiakna an neih hnuah Amazon tihchereu dan nan tum an nei tlang a, inremna erawh an siam chiah thei lo thung.
Heng ram pariat aiawhte hi Brazilian city Belem-ah ni hnih awh inhmuhkhawmna an nei a, hei hi kum 14 chhunga inhmuhkhawmna an neih leh hmasak ber a ni a.
Thuchhuah intawm an siam zuiah ram ngaw tihchereu tihtawp a nih theih nan tanrual an tum thu sawiin mahse Amazon venhimna kawngah thukhat vuaa kal aiah ram tinin a hranpa theuha chetlak ni se an ti ta thung.
Climate change beihletna kawngah Amazon humhim hi pawimawh ber pakhata ngaih a ni a.
Summit neih hmain Brazilian President Luizz Inacio Silva chuan kum 2030-ah ram ngaw tihchereu tihtawp a nih theih nana ‘common goal’ neih a rawt a, a he a policy hi Brazilian sorkar chuan a kalpui tawh sa a ni.
Amazon ram ngaw 60% vel chu Brazil ram chhunga awm niin khawvela rainforest lian ber a ni a. Inhmuhkhawmnaa tel ram dangte chu Bolivia, Colombia, Ecuador, Guyana, Peru, Suriname leh Venezuela te an ni.
Lula chuan thusawina a neihah ‘climate crisis chu a chhe zual zel’ tia sawi bawkin, “kan hun laia chona a ni a, lungruala kan chet a ngai a ni” tia sawiin, “a hmanhmawh thlak takzet bawk” tiin a sawi bawk.
Lula an Jair Bolsonaro a thlak hnuah Amazon tihchereu chu nasa takin a tlahniam nghal a. Bolsonaro kha chuan conservation aiah development thlangin hei vang hian Aamzon ram ngaw chu kum tinin Sq km sang tel hloh leh tihchereu in a awm phah a ni.
Ram hrang hrang pariat tena joint delcaration an siam chu Belem declaration tih niin ‘Amazon humhim bur’ chu thupuiah an nei zui a. Chumi tur chuan water management, health, sustainable development mai bakah global climate summit neihnaah te tanrual an intiam a ni.
Duhthusam ang chiahin inremna siam a ni lo chungin he sumit hmang hian Amazon chhehvel ram te chuan tun huna harsatna hmachhawn lian ber thleng mek hmachhawn dan turah an lungrual thawkhata ngaih a ni thung.
Thil thenkhatah ngaihdan inang lo awm thungin, Colombia president Gustavo Petro chuan oil exploration thar kalpui miah lo tura intiam ve turin ram dangte a ngen a, chutih laiin Brazil chuan Amazon river hnar lam hmun chu daidar deuh tumna a nei thung.
Ngaihdan inang chiah lo awm mah se, Amazon region-te chuan climate change beihletnaah lungrualna an nei thuk thawkhata ngaih niin chumai ni lovin kum 2025 UN Climate Change conference, Belem a neih leh tur thawtlawkna anga ngaih a ni bawk.