Ram pawna thei/thlai thawn dan tur APEDA-in dap pui

Ram pawna thei/thlai thawn
dan tur APEDA-in dap pui
Lunglei bawrhsap pisa leh Agricultural and Processed Food Products Export Development Authority (APEDA) Tripura tandun chuan APEDA kaltlanga kuthnathawktute thei leh thlai thar chhuah ram pawna thawn dan leh APEDA hnuaia ruahmanna (scheme) hrang hrang zirin inbiak hmuh theihna hmangin an sawiho.
Agriculture leh Horticulture department hotute, Lunglei district-a thei leh thlai thar leh sawngbawl buaipuitu pawl – NEIDA, Lushai Agriculture Producer Company Ltd, Tawitlang Farmer Producer Company, Blue Mount Farming Society leh Zotlang Self Help Group-II leh Bawbawihi Food Processing leh RAFA Probiotic Juice an tel.
District bawrhsap Navneet Mann bakah sawrkar laipui Ministry of Commerce & Industry hnuaia APEDA Delhi-a deputy general manager Bidyut Kumar Baruah ten an hmanpui a ni.
Sawrkar laipui Ministry of Agriculture & Farmers Welfare hnuaia Directorate of Marketing & Inspection (DMI) Guwahati marketing officer Ashok Yadav chuan thei leh thlai thar chhuah leh sawngbawl sa hralh leh dehral kawnga sawrkar ruahmanna hrang hrang – Integrated Scheme for Agricultural Marketing, AGMARK leh Internship Scheme chungchang a zirtir a. APEDA Tripura-a business development manager Joydev Roy chuan ram pawna thei leh thlai (agri- horti product) thawn chhuah chungchanga APEDA mawhphurhna leh APEDA kaltlanga sum leh paia tanpuina awm theite a sawifiah. Zawhna awmte chhan a ni bawk.
He hunah hian Lunglei District ODOP (One District, One Product) thei – balhla bakah sawhthing, hmarcha, serthlum, thingfanghma leh dragonfruit thlur bing niin, ram pawna thawn chhuah tham thar tur leh dahthat rei theiha sawngbawl kawnga hmasawnna tur zirho a ni.