Ram pawnah Mizo hmarcha
leh sawhthing thawnchhuak
Mizoram State Rural Livelihoods Mission (MzSRLM) hnuaia din Ropuiliani Women Farmer Producer Company Limited tharchhuah Mizo hmarcha metric ton 10 leh sawhthing metric ton 18 chu Rural Development minister Prof. Lalnilawma chuan CH Saprawnga Truck Terminal, Rangvamual Aizawl atangin a vailiam.
Thawnchhuah hma hian a tharchhuaktu company leha leitu aiawhten inremsiamna thuthlung ziakin sum inhlan nghal a ni a. Thlaithar leitu hi Sus Agri Development Pvt Ltd Bengaluru niin, sawhthing leh Mizo mmarcha an lei hi Gujarat-a phurhthlak tur a ni. Heng Mizo tharchhuah hi India ram pawna thawnchhuah tura ruahman a ni.
RD minister chuan market zawnna kawngah inrintawnna a pawimawh hle, tiin, kuthnathawktuten hlawkna tam thei ang ber an dawn theih nana hma lak chu sawrkarin a ngaipawimawh tih a sawi.
Ropuiliani Women Farmer Producer Company Ltd hi MzSRLM/ RD department hnuaia sub-scheme pakhat, Mahila Kisan Sashaktikaran Pariyojana (MKSP) value chain project kaltlanga din a ni a. MzSRLM hnuaia self help group member hmeichhiate chu shareholder-a ziahluh an ni. Producer company kaltlang hian sawhthing, hmarcha leh aieng hralhna mumal zawk nei tura hma lak a ni.
Mizorama district 7 – Champhai, Khawzawl, Saitual, Aizawl, Serchhip, Mamit, Kolasib District leh RD Block 15 – Champhai, Khawbung, Khawzawl, Ngopa, Phullen, Aibawk, Thingsulthliah, Darlawn, Serchhip, East Lungdar, Reiek, West Phaileng, Zawlnuam, Thingdawl, Bilkhawthlir tuamchhuah tum a ni.
-- Advertisement --
MKSP value chain project
8 He project huamchhunga khaw 126 atangin shareholders mi 10576 tal inziakluh tir tum a ni a. Tun dinhmunah company shareholder 960 chuang inziaklut tawhin khaw 56-ah hma lak a ni.
8 Tun dinhmunah he producer company hian Khawbung RD Block leh Khawzawl RD Block hnuaia self help group member hmeichhia shareholders khaw hrang hrang hnen atangin sawhthing leh Mizo hmarcha a leikhawm mek.
8 Sawhthing hi kg. ah Rs 53-70 inkara lei niin, Rs. 15,46,094 hu leikhawm a ni. Mizo hmarcha hi kg ah Rs. 340- 390 a lei niin, a vaiin Rs 56,37,692 hu leikhawm a ni tawh. Kuthnathawktute hnen atanga sawhthing leh Mizo hmarcha leikhawm nan Rs. 71,83,786 he company hian a hmangral tawh a. Thlai thar leikhawm hi company warehouse Zoram Mega Food Park Khamrangah dah a ni.