Ram pum huapa pakhatna
Ngopa lawmman lak lawmpui
Ngopa khua in tehfung hrang hrang awmsa hmanga India rama village council hma la tha tehnaa a titha ber lawmman an lak chu Inrinni khan Aizawlah lawmpuina buatsaih a ni.
Ngopa Welfare Committee leh Ngopa Students’ Union huaihawtin Aizawl Dawrpui Venga F Rodingliana te inah award dawn lawmna hi buatsaih a ni a. Ngopa VCP K Lalremsiama chuan lawmman an lak theihna tur hian an khuaa pawl hrang hrang bakah sawrkar department ten tha an thawhhlawk vek a, a bikin an nodal department LAD-in an phurpuina zar a ni tih a sawi. Sawrkar laipui lama ministry hotute pawh an hmalakna hian an lung a dum hle nia an hmuh thu a sawi.
He award-in sumfai a kentel cheng vaibelchhe 1.50 chu tuna tehfung hmannaa tan lak lehzual an ngaihnaah te a tam zawk hi hman ngei an duh tih sawiin, an khua chu ‘model’ a nih zel theih nan hma lak an tum tih a sawi a ni.
Sawrkar laipui Ministry of Panchayati Raj-in a tihchhuah danin, local self government department-in panchayat tha neihna tura hmalakna tur chi 9 a duan hmangin, Nanaji Deshmukh Sarvottam Panchayat Satat Vikar Puraskar category-ah Ngopa hi, India rama VC/Panchayat 250000 chuang zingah a titha ber a ni.
NWC assistant secretary F Rodingliana pawhin Mizoramin tehna hrang hranga a chhe lamah a lan reng laia Ngopa khawtlangin India rama VC tha ber lawmman a dawng chu Mizoram tan a tha lama bul tanna ni thei se a duh tih a sawi a ni.
Ram pum huapa pakhatna Ngopa lawmman lak lawmpui
Get real time updates directly on you device, subscribe now.
Next Post