Ram pumah damdawi zuar inkhar dawn

Ram pumah damdawi zuar inkhar dawn
India sawrkarin e-pharmacy, online-a damdawi zawrh leh lei a phal avangin India ram puma damdawi zuar ho an lungawilo a, vawiin – May 20 hian an dawr an khar dawn. Mizoramah pawh hei hi zawmin dawr an khar anga, sawrkar damdawi ina damdawi zawrhan erawh an khar loang.
Mizoram Chemists & Druggists Association (MCDA) hruaitute sawi danin, sawrkar laipui Ministry of Health & Family Welfare chuan kum 2018 khan online/ e-pharmacy hmanga damdawi hralh leh stock leh hralh chhuah khuahkhirhna chungchangah ‘General Statutory Rules’ tihchhuahahna tur rawtna a siam a, tun thlengin tihpuitlin a la ni lo. Hei vang hian tuna dan hman mek Drugs and Cosmetics Act 1940 leh Rules 1945 hnuaiah online-a hralh hi dan khalh a ni.
Sumdawnna kaihhnawih mai ni loin mipui leh damlote himna atan a pawi thei tih an sawi a. Damdawi zawrh chu sumdawnna satliah a niloa, mipui hrisel zawkna atan leh damlote tha taka an inenkawlna atan leh, hriselna kawnga hma kan sawn theihna a ni tih an sawi bawk.
Lungawiloh lantir hi All India Organisation of Chemists & Druggist huaihawt a ni a, an ni hnuaiah hian MCDA pawh hi an awm.
Hetihlai hian MCDA chuan, India ram state dangah pawh an tih bik loh laia Mizoram sawrkarin damdawi dawr-te pharmacist thutchilh tura a tih tak bik tlat avanga harsatna an tawh thu an sawi a. Thil tha tak ni mah se, Mizoramah pharmacist zir chhuak an la tam loh avangin, an indaihlo a. Heti chung hian sawrkarin hma a lak luih miau avang leh, hremna lekkawh a nih bawk si avangin damdawi zuar tam tak a nghawng tih an sawi.
Hei hi chief minister leh Health minister hnenah an thlen tawh a, sawrkar thil tum dodal an tum loh rualin, pharmacist an la indaih lo tih erawh hriatsak se an duh a. Tun dinhmunah sawrkarin an harsatna chinfel sak a tum tih an hriatin, a chinfel thuai an beisei tih an sawi a ni.
Damdawi man atanga an hlep nasat zia sawi awm chungchangah, damdawi zawng zawngah hlep a tha uchuak vek lo tih MCDA hruaitute hian an sawi bawk a. Company tha, belhtlak leh rintlak (branded company) leh fakmawi chawp ngai leh generic medicine kan tih, PDC (Propaganda Drugs Company) ang chi, quality leh a man inkar a inhlat hle tih an sawi. Heng damdawi man tlawm, zawrh kual thin hian a thawh tur ang a thawh loh fo bakah damdawi lem/ a tak awm lo ang chi siam tawk an awm fo tih an sawi.