Ram rorelnaa Pathian ram tundin hi min tehna tur ber – Lalduhoma

Ram rorelnaa Pathian ram
tundin hi min tehna tur ber
– Lalduhoma
Mite beiseina zawng zawng tihlawhtlin vek seng lo mah se, Pathian hmaa an intiamna – ram rorelnaa Pathian ram tundin chu Pathian leh mipuiin an tehna tur a ni dawn tih chief minister Lalduhoma chuan a sawi.
Thawhtannia ZPM party office-a inkhawmah chief minister chuan, ram kaihhruaina kawngah Pathianin ZPM chu tih tur a pe a, mite term khat chhung chuan an hmachhawp tam tak puitling hman dawn lo mah se, Pathian hmaa an intiamna chu he ram rorelnnaa Pathian ram tundin a ni a, hei hi Pathian leh mipuiin an tehna tur pawh a ni tih a sawi.
Ram leh hnamah Pathian ram a thlen dawn chuan a thlentirtu tura a hmanrua – sawrkarna fawng chelhtu, party, sawrkar leh mimal theuhah Pathian ram a thlen phawt a ngai tih sawiin, “A hun taka sawrkar hnathawk an thlen a, a hun hmaa an haw lohna turin Kai app leh biometric attendance kan siam a, mi thenkhat pumpelhna zawngin an la hmanhlel hle. Mobile phone lei belhin an kawltir nite in kan lo hre lehzel a, moral reform buaipui hi a hahthlak hle a, tan mar pat reng a ngai. Miin a hna hi Pathian rawngbawlnnaah a pawm chuan biometric attendance tih a ngai miah lo tur a ni. Heng kan kalpui chhan chu anmahniah Pathian ram a thlen theihna tura sawrkar hmalakna a ni,” a ti.
Bana Kaih chungchangah pawh, thawk si loa a thlawna dawn a reh ta ringawt pawh hian mi rilru a tih hrisel chho tan mek laiin, mi thenkhat, an project leh an sum dil inmil lo lutuk a la awm fo tih a sawi a. An sum lakluh tur milin thuneituten an siamrem thin tih a sawi. “Hengte hi vuivaina chi a ni loa, sum lakluh tur mila felfai taka ruahman sak an ni. Bana Kaih hian enge a tum kan tih chuan, moral reform a ni a, kan rilru pawh a insiamrem chho mek a ni,” a ti.
Mizoram State Project Monitoring Committee an din a, eptu party leh NGO an tel thahnem hle a, tuna an endik tam zawk chu sawrkar hmasa hunlaia an lo kalpui tawh niin, building lian pui pui an lo sa tawh a, in thiahtir leh theih a ni tawh si lo tih a sawi. “Kan ngaihpawimawh ber zawk chu, ZPM sawrkar hnua project an ni, induhsak theih a ni loa, ZPM pa hnathawh pawh nise a tir atangin min endik pui mek a ni,” a ti.
Mi thenkhat, ZPM-a tui lo inti ten amah an berawn a, an tui loh chhan kha a hrechiang si a, dan bawhchhiat ngaia thil tih tir an tum a, a thei lo tih Lalduhoma hian a sawi.
“ZPM party pawh inenfiah nawn ang u. Campaign laia kan hla sakte, kan rau chante kha hre nawn thar ila, MLA leh minister kan hmuh chhan hi A ram leh A felna ni loin, a pek belhchhah tur zawk kan buaipui lutuk ta a ni lo maw. Keini laka Zoram mipui an beidawn chuan khawihah nge beiseina an nei leh tawh chuan ang, party dangah beidawngin ram hruai turin min thlang a, mipui hi kan tihbeidawn a thiang tawh lo,” a ti.
Hemi kawngah hian an hotute kaihza veng tura chahin, mahni hamhaina tur ringawta ZPM-a an thawk a nih chuan, an tum ber Zoram politics-ah Pathian ram a thleng ngai dawn lo tih a sawi a ni.