Ram siamtha turin term hnih/ thum tal kan sawrkar a ngai – Lalthansanga

Ram siamtha turin term hnih/
thum tal kan sawrkar a ngai
– Lalthansanga
Minister Lalthansanga chuan Mizoram siamtha turin ZPM chu term hnih-thum tal an sawrkar a ngai tih a sawi.
Ningania ZPM office Lungleia hun a hmannaah ZPM hruaitu Lalthansanga chuan, border area-ah kan awm a, hnam anga run mek kan ni a, ZPM hi sawrkar lo ta se, engtin nge kan ram a awm ang tih a ngaihtuah tih a sawi.
“Tripura nen kan inrina laiah Tripura sawrkar chuan Thaidawr tlangah building a sa a, Mizoram sawrkarin sa lo turin a hrilh a, an thiat leh ta vek a ni. Sawrkar hmasa in an tih loh tam tak, police outpost pawh kan thuamtha tan a, ramri hrula kan mipui thlabarna thin ZPM sawrkar chuan a thlamuan tan a ni,” a ti.
Sawrkar hnathawkten sawrkar kalphung fel tak, a nih dan tur angin an kal chho mek a, hetih lai hian mipuiin kan zo lo deuh em aw a tih theih, tiin, mi intellectual-te chuan an hrethiam chho mek tih a sawi.
Department officer-te thlengin mipui tana dawr nuam taka hna thawk turin an hrilhhria a. Sawrkar hna lakah pawh a tling leh tha, thalaite tuihalna phuhru turin tan an la a, party bil induhsakna anga sawrkar hna lak kalpui a nih chuan, kalphung hlui ang chauh an ni dawn a, ram leh hnam damna turin thalai, a thiam leh a tling, eng party pawh nise, sawrkar hnaa an lak a hun a, chutiang chuan hma an la chho tih minister hian a sawi a ni.
“Kan ram siamtha tur hian ZPM hi term hnih term thum tal a sawrkar a ngai a, kan kal dan hi miten an thlir reng a ni. Moral reform pawh kan ngai a, kan rilru puthmang a tha lam hawia kan thlak a tul a ni,” a ti.
An eiruk ve loh tur thu sawitu party an nih avangin an lakah sawrkar laipui a inhawng hle tih Lalthansanga hian a sawi bawk.