Ram tan Sigurdsson a kir

Ram tan kum thum dawn a khelh loh vang vang hnuin Gylfi Sigur-dsson chu Thawhtan zan khan Iceland tan a inlan leh ta a. Si li faia Lie-chtenstein an hneh tumin Gylfi Sigurdsson hian goal hnih a thun a, Iceland tana goal thun hnem ber thar a ni nghal.
Group J lamah table hnuai ber dawttu-a awm mek Iceland hian Laugardalsvöllur-ah tla chiang tawh Liech-tenstein an mikhual a, si li faia chakin play-off khelh phak beiseina thar an nei. Chak mamawh Iceland hian minute 22-naah penalty an hmu a, he penalty hi Gylfi Sigurdsson chuan pet goal in hmahruaina goal a thun. Minute 22-naa hmahruaina goal an thun hnuin minute 44-naah Alfred Finnbogason chuan an goal hnihna a thun zui leh a, si hnih faia hmahruai chungin chawlhlawk an hmang.
Chawlhlawk hnu lamah Iceland an khel tha chhunzawm a, goal an thun leh thuai. Minute 49-na lekah goal hmahruai thuntu Gylfi Sigurdsson chuan an goal thumna a thun a, minute 63-naah Arnar Haraldsson chuan an goal lina a thun belh zui leh bawk a, si li faiin an chak zui ta a ni.
An mualah an chak vangin Iceland hian khelh riat atangin point 10 an hmu a, palinaah an inhlangkai. An chung chiaha awm Luxembourg nen point khat lekin an inthlau mek a. Hei vang hian play-of khelh phak beiseina an nei sang leh zual. Group J-ah hian khelh riat atanga point 24 hmuin, Euro 2024 hmachhawn turin an tling chiang tawh a. Point 16 hmu mek Slovakia pawhin tlin an hnaih tawh viau bawk. Heti a nih vang hian Luxembourg leh Iceland tan hian direct a tlin theihna kawng a awm tawh lo a ni ber a. Play-off an khel phak hlauh a nih chuan chu chu an hun tha neih hnuhnung a ni ang.
Sigurdsson a kir, goal a thun
4-0 a Liechtenstein an hmachhawn tum hian ram tan kum thum dawn inlan tawh lo Gylfi Sigurdsson a inlan a, goal a thun leh ta. Everton, Tottenham leh Swansea City player hlui Sigur-dsson hian kum 2010 atang khan Iceland tan a khel tan a, inelna hrang hrangah vawi 80 khelin, goal 27 a thun tling tawh a, Iceland tan goal thun hnem ber a ni. Tarlan tawh angin Sigurdsson hi ram tan a inkhel lo vang vang a. Manager Age Hareide chuan Luxembourg leh Liechtenstein hmachhawn turin a ko ve leh ta nawlh a. November 2020-a Denmark an hmachhawn hnua a vawi khat nan ram tan goal thunin, record a siam ta hial a ni.