Ram tana inkhelh bansan Muller leh Shaqiri

2024 European Championship a zo a, player leh coach thenkhat chawlh thu hriat tur awmin, 2014 World Cup-a Germany champion-puitu Thomas Mueller leh hun rei tak Switzerland innghahna ni reng thin Xherdan Shaqiri-te’n Thawhtanni khan international football chawlhsan thu an puang.
Kum 34 mi Muller zawk hian national team tan game 131-ah goal 45 a thun tling a, kum 14 zet ram tana a theihna a hman hnuah a international career a titawp ve ta a ni.
July ni 5 quarter-final match-a 2-1-a Germany-in Spain an hneh lohna kha Bayern Munich forward tan ram tana a tournament khelh hnuhnungber a ni ta a, kha game-ah khan minute 80-ah kelmual luhtir a ni.
Muller hi Germany national team tana khel tam pathumna niin, 2010 World Cup-a pathumna an nih tum khan Golden Boot leh Young Player Award a dawng kawp.
Chutiang mi chuan Thawhtannni khan social media kaltlanga a chawlh puanna video tichhuakin, “Ka ram tana khelh hi englai pawhin ka inchhuanna a ni fo thin a, chak leh champion kan lawmho tum a awm a, kan tahho chang a awm bawk.
“Kha’ng kum zawng zawnga min thlawp tlatna avangin fans leh ka Germany team-mate zawng zawng chungah ka lawm e,” tiin.
German national team chief Rudi Voeller pawhin Thomas Muller ang midang an awm loh thu sawi chungin German football tana a hlutna chu tehchhuah ngaihna awm lo niin a sawi a, Bayern tan emaw national team tan emaw a khelh reng rengin nunchang dik leh entawntlak bakah top striker a nihna a pholang zel thin,” tiin a fak.
Shaqiri ve thung…
Swiss player zinga major tournament pasarih khel tling awmchhun Xherdan Shaqiri pawhin Switzerland tan match 125 khela goal 32 thun kha a duhtawk ve ta a, Thawhtanni vek khan international football a mangtha thu a puang ve bawk.
Bayern Munich leh Liverpool winger hlui Shaqiri hian Muller ang bawkin kum 14 chhung ram tan a theihna a hlan a, Swiss national team tan World Cup 2010 atanga Euro 2024 chhungin tournament lian chin vawisarih a khel tling a; Euro 2024-ah erawh chuai lam a lo pan ve tak avangin game hnih chiah a khel a, an pawlin quarter-final an paltlang zo lo.
Kum 32 mi chuan Instagram kaltlangin thlahna thuchah a tarchhuak a, “Tournament pasarih, khati zat goal, Swiss national team tan kum 14, theihnghilh ngai tawh loh tur hun hlu tak tak ka lo tawngbaw ve ta a, tunah chuan national team mangtha hun a lo ni ve ta. Hriatrengna ropui takte chuan min thlah tawh lo ang. In zavaia chungah ka lawm e,” tiin.
FC Basel leh Bayern tana Swiss leh German league title vawithum ve ve la tling Shaqiri hian Liverpool tan Premier League pawh a lo khel tawh a, kum 2022 atang khan Major League Soccer club Chicago Fire tan a khel mek a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More