Ram venhim lam ngaihtuahtute thu Tripura-in check post a siam thiahtir

Ram venhim lam ngaihtuahtute thu
Tripura-in check post a siam thiahtir
Ramri kaltlanga dan bawhchhiatna ven kawnga chak zawka hnathawktuten hma an lak ho theihna tura Mizoram sawrkarin a din, Mizoram Security Coordination Committee chu a vawikhatna atan an chairman, chief minister Lalduhoma hoin Thawhtanni khan an thukhawm.
Indo- Myanmar leh Indo- Bangladesh ramri dinhmun, Mizoram leh a thenawm state ramri dinhmun, ramri paltlanga ruihhlo leh ralthuam tawlhruk chungchang leh hma lak zel dan tur an sawi a. Tripura leh Mizoram ramri, New Kawnpui vela Tripura State Rifles-in temporary check post leh sentry shed an rawn siam chu chief secretary leh DGP level-a inbiak a nih hnuah Tripura Rifles hian an hmunhma tichhiaa an kalsan thu sawi a ni.
Heng bakah hian ILP chungchang, One Nation One Ration Card anga Manipur atanga himna zawnga rawn insawnten ration card an neih ve vekna tur, international tourist (khualzin) Mizoram rawn tlawh duhten rang zawka permit an neih theih dan tur pawh sawi a ni.
Thutkhawmah hian Home minister K Sapdanga, Excise & Narcotics minister Lalnghinglova Hmar, chief secretary Khilli Ram Meena, DGP Anil Shukla bakah Mizorama sawrkar laipui leh state hnuaia venhimna lam thawktu hrang hranga hotute chu member an ni.
Thutkhawma report thenkhat:
8 Mizorama sualna record tam ber chu rukruk case a ni mek a, kum tling lo pawngsual (POCSO Act) bawhchhiatna pawh a tam hle bawk.
8 Kum 2024 chhung khan ruihhlo kaihhnawih thubuai ND&PS Act hnuaiah case 338 ziahluh niin, kuminah May thleng khan case 114 ziah luh a ni.
8 Kumin May thlengin Methphetamine kg 648.824 man a ni tawh a, an hralhna ang chuan cheng vaibelchhe 84 hu vel nia chhut a ni. Crystal meth kg5.169 an man tawh a, vbch. 15.5 hu vel nia chhut a ni.
8 Kum 2024 chhung khan ralthuam leh puak thei case 47 ziahluh a ni a, mi 56 man an ni. Kuminah May thleng khan case 34 ziahluh tawh niin, mi 51 man an ni.