Ramngaw leh nungcha himna ngaipawimawh hle r’u – CM

Mizorama kawngpui siamtu soil bank hmang tha tur leh ramngaw leh nungchate himna ngaipawimawh hle turin chief minister chuan National Highway & Infrastructural Development Corporation Limited (NHIDCL) hotute a chah.
NHIDCL Regional Office Aizawl executive director Vivendra Takhar chuan Thawhtanni khan chief minister Lalduhoma chu a pisaah hmuin lawmpuina a hlan a, Mizorama an hnathawh tlangpui hrilhin hmalak zel dan tur an sawi dun.
Chief minister chuan an kawng siam mekah kawngin a paltlang khawchhung kawng ngaipawimawha hna hmasaa nei thin tura a duh thu a hrilh a. An hnathawh mek tikhaihlak thei thil a awm a nih chuan chak taka bawhzui tura hrilhin, sawrkar pawhin theihtawpa a puih tur thu a sawi. Soil bank atana hmun thlanah chauh an leivung paih a, ramngaw leh nungchate himna ngaipawimawh hle turin a chah a. An soil bank-ah duhdah taka leivung hnawl khawm emaw hnawl liam mai loin, mawi leh mam taka umzui a, park atan pawha hman zui tlaka duang turin a ngen. “Ramin hma a sawn zel theih nan kawngpui tha kan mamawh a, in hnathawh a thain a rintlak ngei tur a ni,” a ti.
NHIDCL executive director hian powerpoint presentation hmangin Mizorama an hnathawh hrang hrang a sawifiah a. Chief minister-in a ngaihpawimawh a sawite chu tihhlawhtlin ngei an tum tur thu an sawi a ni.