Rampum Chawnghei tawngtai nei dawn

Kohhran pawl hrang hrang leh rawngbawltu ministry hrang hrang atanga mi thahnemngai intelkhawm chuan May 23 hian rampum huap chawngheia tawngtai neih an rel.
Heng intelkhawm hi ministry hrang hrang – Gilgal Tawngtai, Naomi Tawngtai, Rampum Chawnghei Tawngtai, Zoram Thar, Revival Healing Ministry, Eliza Maicham, Mangangte Thian, Operation Kingdom Ministry, Origin Worship leh kohhran pawl hrang hrang – Presbyterian, Baptist, Salvation leh IKK member-a rawngbawltute an ni tih an sawi a. an ruahmanna hi ‘Rampum Nehemia Chawnghei Tawngtai’ tiin, Pathian hnen atanga an dawn anga ti tur an ni tih an sawi.
“Zofate’n Pathian thu kan awihlohna te, a Thuthlung kan bawhchhiatna leh Pathian hming kan tih mualphona avanga ngaihdam dilna tawngtaina a ni ang,” an ti. Israel fate bawhchhiatna avanga Nehemia’n chawngheiin a tawngtaina ang khan, ram leh hnamin Lalpa Pathian hmaah inngaitlawmin, saiip puan sinin, chawngheiin sual simin a hmaah mahni awm chum theuhin ram leh hnamin Lalpa pawi kan sawinaah ngaihdam dilin an tawngtai dawn tih an sawi a ni.
Chawnghei tawngtai hi Aizawl atanga huaihawt tur ni mah se, mitinin mahni awmna hmun, khua, veng, biak in, hall, Tawngtai Tlang leh mahni in atanga lo zawm ve turin an sawm tih an sawi a. Chawhma dar 10 a tanin, rualkhai taka an tawngtai theihna’n TV leh YouTube ah live-a pek chhuah a ni dawn tih an sawi.
An ruahmanna hi chief minister Pu Zoramthanga pawh hmaichhanah hmu in an sawipui a, a ni pawhin tha a tiin, lo zawm ve a tum tih a lo hrilh thu an sawi a. Mizorama kohhran pawl hruaitute leh NGO hruaitute pawh hriattir an ni a, tha an tiin an thlawp tih an sawi bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More