Ramri-ah kawngka 13 awm dawn

India sorkarin Myanmar nena inrinna hung phui a tum mek a, inkalpawhna tur hmun 13-ah hawn a ni dawn.
Budget Session liam taah khan home minister K Sapdanga’n entry/exit point 13 a awm dawn tih a sawi a, “Indo-Myanmar border entry/exit point siamna atan hian hmun 13 thlan a ni,” a ti.
Entry/exit point siamna turte hi Lobo (Lungbun), Chapi (Sapi/Chapui), Lopu (Lungpuk), Lomasu, Zokhawthar, Zote, Hnahlan, Vaphai, Farkawn, Zochachhuah, Sekulhkai, Hrianghmun leh Thingsai te a ni.
District Border Coordination Committee te’n entry/exit point tur hi a hmunah enin spot verification/survey an nei tawh.
Home minister sawi danin, border fencing chungchangah han Siaha, Lawngtlai, Saitual leh Hnahthialahte preliminary survey & feasibility assessment neih a ni tawh a, district dangah neih a la ni lo.
Border fencing atan hian border district tam zawkah a ram neitu, VC member-te leh khawtual mite rawn tel an ni a, hmun thenkhatah erawh rawn an la ni lo.
India sorkarin Myanmar nena inrinna hung chhuah vek a tum a, Mizoramah chuan km 510 vel ni tura ngaih a ni. Sap tawng chanchinbu lama a lan danin, Arunachal Pradesh-ah km 1643, Mizoramah km 510, Manipur-ah km 398, Nagaland-ah km 214-a thui a ni dawn a, 2035-ah hung chhuah hman tum a ni.
Manipur-a Zo hnahthlakte’n Myanmar nena inrina hung hi an duh lo a, Mizoramah chuan duh lova au langsar tak pakhat chu ZoRO an ni.