Ramri buai chinfel tum danin beisei ang a ni lo

ZPM sawrkarin Assam nena ramri buai chinfel an tum dan chu beisei ang a ni loa, rilru a ti na tih Congress hruaitu PC Laltlansanga chuan a sawi.
Zirtawpnia Congress Bhavan-a inkhawmah MPCC general secretary PC Laltlansanga chuan, ZPM chu pawl hrang hrang intelkhawm ni mah se, an bulpui ber chu ZNP a ni a, an chief minister pawh ZNP president thin niin, ZNP chu nationalism tuipuitu, ZNP an nih lai pawha ramri chungchang buaipui ve tawh thin leh ramria buaina apianga kal ve thin an ni tih a sawi.
ZPM an nih hnu pawhin ramri buaina an aupui nasa a, ramri buaina apianga kal thin an nih laiin, hmannia inbiakna minute kha beisei ang a ni loa, rilru a ti na tih a sawi bawk.
“Aitlangah Assam sawrkarin an duty post pawh turin kawngpui an lai mup mup a, Mizo huan leh thlai tichhe tam tur zawngin an che a. Chu’ng chu titawp tura hrilh leh dodal lam reng reng an inbiaknaah khan kan sawrkar khan an sawi loa, chu aiah chuan cultural programe neih ho an rel zawk a ni,” PC Laltlansanga hian a ti. Hnam inpumkhatna tichhe khawp leh Zoram sat zim zawnga sawrkar document kalpui chu hmasawnna kebai a ni tih a sawi.