Ramri hi tharuma chinfel chi a ni lo – Lalbiakzama

Ramri chu tharum nena chinfel chi a ni loa, inbiakna nena chinfel chi a ni zawk tih Mizoram Home secretary hlui Lalbiakzama chuan a sawi.
Zirtawpnia Congress Bhavan-a inkhawmah MPCC general secretary ni bawk Lalbiakzama chuan, ramri kan vei a, kan sawi thin a. Tunah khuan kan ramri a la che loa, engmah a la danglam lo tih a sawi. “Ramri chungchangah kan tana tha turin ngaihtuahna seng ila, dinna nghet kan neih a ngai. Ramri buaina hi tharum nen inkahna nena chinfel chi a ni loa, inbiakna nena chinfel chi a ni,” a ti.
HPC nen kum 1994 ah Pu Lal Thanhawla kaihhruai Congress sawrkar laiin inremna a awm tawh a, chhan hrang hrang vangin a tluantling ta lo tih a sawi. 2018 April 2-ah Pu Lal Thanhawla kaihhruai sawrkar lai bawkin HPC(D) nen inremna tluantling a awm a, silai tha tak takte an tung tih a sawi a ni.
“Inremna ang hian interim sawrkar din a ni ta a. He inbiaknaah hian khatih laia Congress sawrkar khan a hruaituah min ruat a, a lehlam lehlamah inremna kan duh tlang a, tha takin kan inrem a ni. Interim sawrkar kan din kha MNF an sawrkar khan thlak an tum ta a, kei chuan buai leh theihna a nih avangin ka lo dodal a ni. Sakawrdaia Sinlung Hills Council building tur pawh sum an neih loh avangin MNF sawrkar khan an sa zo thei loa, chutih laiin airport tihlen nan chuan sum tamtak an hmang thei tho si,” a ti.
SHC hi Congress sawrkar kutkawih a nih avangin Congress party chuan a neitu nihna rilru a pu a, an duat dawn tih MPCC hruaitu hian sawiin, chu chu SHC huamchhung amite pawhin hria se an duh tih a sawi.
Rorelna dik kan sawi thin laiin ‘dikna rorel’ tih a dik zawk em, tia zawhna siamin, “Congress party hian dikna rorelna kan kalpui ngam angem? Kan chenpui hnam tenaute lakah hian dikna rorelna kan kalpui ngam angem tih hi kan inzawh a ngai,” a ti. Pawl thenkhatin donation an khawn chungchangah, donation chu khawn thiang ni mah se, an pek phal tawk bak phut chhuah chu dikna rorelna a ni thei lo, tiin, hei hi kohhran leh YMA thlenga dodal ngai tih Lalbiakzama hian a sawi a ni.