Ramri hnaiha chetna Assam sawrkar hriatpui loh thil tih – Chief minister
Ramri hnaiha chetna Assam
sawrkar hriatpui loh thil tih
– Chief minister
Ramri hnaiha Assam lam mite chetna chu an state sawrkar hriatpui emaw tih tir emaw ni loin khaw pakhatin lo vah an tumna mai niin, ti tawh lo tura hriattir an ni tih chief minister Lalduhoma chuan a sawi.
Kolasib district Saipum rama tunhnaia Assam lam mi chetna hnuhma hmuh thu a darh hnu ah, Nilaini khan Kolasib district bawrhsap Robert C Lalhmangaiha leh SP Lalrinpuia Varte ten Saipum tlawhin, khawtlang hruaitute nen thil awmdan an sawiho a. Saipum khawtlang hruaitute chuan, hnam dangten lo vahna atana chet an rawn lakna hi a hma chuan Mizoram sawrkar hnuaia police-te duty-na thin a ni a. Kawng chhiat avanga he hmuna police duty an awm theih tak loh hnuah, venhim hna a lo chak ta lo chu remchangah la in Assam lam hian an rawn zuam ta niin an ngai tih an sawi a ni.
Saipum khawtlang hruaitute chuan he hmun hi Saipum ram ngei a ni tih an sawi a. Assam lam atanga he hmalakna hi an kalpui zel a nih chuan nakin zelah ramri buaina hlawm lian zawk a chhuak thei dawn tih an district thuneitute hnenah hian lo thlenin, sawrkar chu a hma thei ang bera hma la turin an ngen tih an sawi a ni.
Ningani khan Kolasib district thuneitute hi an thawkchhuak leh a. Assam lam pawh hi an va zawtchiang tih sawi a ni.
Chief minister Lalduhoma chuan, lo vahna hmun hi Mizoram Police Zunzam Bankang Camp atanga km. 8 velah a ni a, lirtheia tlawhpawh theih a nih loh avangin kea darkar hnih leh a chanve vel kal a ni a, lo hi hrei leh chem hmanga vah niin, khawl hmanna hnuhma hmuh a ni lo tih a sawi.
Lo vattute hi a hmun tlawh lai hian hmuh tur an awm loh avangin zawhfiah zel a ni a. Assam Cachar district Bandarkhal-a Bru chhungkaw 30 velin lo atan an vah a nih thu an headman hnen atangin hriat a ni. Kumin January thla tawp leh February tir lama an vah a ni a. Tawngka in kut lo thlak zui tawh lo tura tih an ni.
Bandarkhal headman sawi dan chuan Assam sawrkar/ Forest department lam hriatpui leh inrawlhna a awm lo a. Kolasib district hotute chuan Cachar SP pawh thil awmzia an hrilh tawh a, buaina a awm lohna turin hma an lak nghal tur thu an lo hrilh tih chief minister hian a sawi a ni.