Ramri hrula kawngpui leh lei siam thar zingah Mizoramah project 3 tel

Ramri hrula kawngpui leh lei siam thar zingah Mizoramah project 3 tel
Union Defence minister Rajnath Singh chuan D-S-DBO Road, Ladakh-ah Pathianni khan online-in Border Roads Organisation (BRO) hnuaia infrastructure project 125 a hawng a. Heng project hi Lt. Gen. Raghu Srinivasan hnuaia kalpui niin, India ramri hnaih state leh union territory hrang hranga leilung chhengchhe tak tak kara thiamna sang leh remhriatna hmanga siam kawngpui 28, lei 93 leh a dang 4 a tel.
A hawnna inkhawmah hian Lok Sabha MP Richard Vanlalhmangaiha, Rajya Sabha MP K Vanlalvena leh Project Pushpak (GREF) chief engineer Rajeev Dua pawhin an office atangin video link hmangin an chhim a. Heng project-te hian ram humhimna leh ramri hrula hmun kilkhawr tak takte nena inpawhna tha zawk siam a tum a ni.
Heng project 125 zingah hian Project Pushpak Aizawl hnuaia project pathum – Zawlingling- Mawhre -Sapi (Z-M-S) road, Tuichanglui lei Lawngtlai- Diltlang -Parva (L-D-P) road leh Gausan lei L-D-P road a tel ve a ni.
Kawngpui thar leh lei thar hian kumtluana hmun kilkhawrte pawh theihna a siam dawn a. BRO hotute chuan heng project-te a hun taka zawh a ni thei hian India hmarchhaka leilung chhengchhe tak leh khaw chhe karah pawh ramri hrula hmun tihchangtlunna lamah an inpe hle tih a tilang tih an sawi.
Project Pushpak project pathum hian Mizoram chu India leh Myanmar inrinaa hmun pawh harsa tak takte nen a zawm a. Khawtlang leh eizawnna lama hmasawnna a thlen dawn bakah khaw tam taka mipui chengte tan inkalpawh tawnna tha a siam dawn tih an sawi a ni.