Ramri hung leh a behbawm…

ZORO chuan ramri hung chu— ‘unau, thlahtu thuhmun, thisen inzawm Zofate India sawrkarin min thendarh a tumna’ tiin, a hlawhtlin lohnan na taka dodal an tum thu an sawi a. Ramri hung avang hian Mizoram leilung thahnem tak kan chan dawn a, ramsa tlatna leh inthlah punna a khawih pawi thei dawn. Ramri atangin metre 150 aia hnai loah ramri hungna hi siam tur a nih avangin ramri hrula cheng thahnem tak ei leh bar zawnna a tla chhe nghal dawn, an ti bawk.
Ramri hung chungchangah hian, kumin February khan Mizoram Legislative Assembly chuan ramri hung duhlohna leh, India sawrkarin ram pahnihte inkalpawh theihna dan Free Movement Regime, tunhma aia a khuahkhirh ta zawk duhlohna resolution an lo siam tawh bawk a nih kha.
India sawrkar chuan Indo-Myanmar border fencing chungchangah hian Thingsai khua atanga preliminary survey kalpui tan a nih tur thu a lo sawi tawh bawk. Ramri hung hi ‘Smart Fencing System’ a ni dawn a, a hungna (physical barriers) dah mawl tawp tur ni lovin, sensor, camera, leh inbiakpawhna (communication systems) changtlung tak nena thuam vek tur a ni.
Border fencing thatna leh that lohna hi a tawn tawnin sawi tur tam tak a awm ve ve dawn tih a hriat a. ZORO te tanchhan ‘thendarh tumna’ chungchangah hian, thenkhat chuan ramri hung hi Zofate inzawmna leh inpumkhatna daidangtu a ni dawn chuang lo; ramri kaltlanga inkalpawh/intlawhpawh theihna ‘dan’ a awm tho dawn. Ramri hung hian, Mizoram tichhetu thil tha lo chi hrang hrang (ruihhlo, smuggling, human trafficking etc.) a ruka zalen taka lo lut tur a dang dawn a, chu chu kan ram dam nan a pawimawh’ an ti ve thung a. Manipur-a ethnic violence leh insurgency hi, hengho zawmpui hrang hrang Myanmar ram chhunga hmun khuar te awlsam taka an rawn inrawlh theih thin avanga punlun thin a ni a; tin, ruihhlo tawlh leh smuggling chi hrang hrang a hluar em em bawk avanga India sawrkar hian border fencing hi dah tum a ni.
Manipur-ah border fencing hi tha takin kalpui ta se, Mizoramah border fencing a awm ve si loh chuan, kan sawi tak ‘thil tha lo, chhe tinreng’ luhka tur chu Mizoram hi a ni dawn tih a chiang sa a, tuna kan tawrhna let tam tak hi kan hmabak tur chu niin a lang.
Pawimawh ta chu, India sawrkar hian security measure thilah border fencing kaltlangpui a tum tho tho a nih chuan, fencing avanga eizawnnain a nghawng tur ‘victim’ te tana eizawnna dang ruahman hi a ni.
Eng pawh ni se, preliminary survey kalpui lai a ni bawk a, thir ling den hun lai a ni e.