Ramri hung leh FMR tihtawp tum dodalin PM leh HM lim hal

Myanmar nena inrina hung tum leh Free Movement Regime (FMR) tih tawp tuma hma lak zui zel nia an hriat avangin, an duh loh zia lantir nan Mizo Zirlai Pawl chuan Nilaini khan Prime minister Narendra Modi leh Union Home minister Amit Shah te lim an hal.
MZP Gen. Hqrs. thuchhuak chuan, Zofate hi kan duh reng vang ni loin, international boundary pathum – India, Myanmar leh Bangladesh-a thendarh kan ni a. India chhungah pawh state hrang hrangah thendarh kan ni a. Zofate min thendarhtu ramri hi, Zofate rawnna leh remtihna awm loa British sawrkarin a siam, Zofate tan engti kawng maha pawm chi a ni lo tih a sawi.
Chutih laiin tunhnaiah India sawrkarin Chin state leh Mizoram state zalen taka inkalpawhna – Free Movement Regime (FMR) tih tawp leh ramri hung a tum tih sawiin, MZP chuan a dodal zel dawn tih a sawi a ni.
United Nations Declaration on the Rights of Indigenous Peoples (UNDRIP) 2007 Article 36-na chuan, ‘Tualchhuak hnamte, a bikin khawvel sawrkar ramri khamin a thendarhte chu an inkalpawhin an inlaichinna tinghet tur leh intanpui tawn a tul pawhin an intanpui tawn anga, sakhaw thil leh khawtlang thil, ei leh bar leh politics-ah an mi leh sate nen inpawha inpawlho theihna dikna chanvo an nei a. Ram roreltute chuan tualchhuak hnamte nena inberawnin hetiang dikna chanvo hi tipuitling turin hma a la ang,’ tia a inziah laiin, Zofate zalen taka inkalpawhna ramri hung leh FMR tihtawp hian unau, ramriin min thendarh dawn avangin pawm theih a ni lo tih a sawi bawk.
‘MZP chuan danin a phal loh ruihhlo leh khap thilte chu ramri hung kher lo hian a tihrem dan dang ngaihtuah zawk turin India sawrkar kan ngen a. Mizoram chief minister leh Home minister chu theihtawpa hma la turin kan lo ngen tawh a. Prime minister hnenah memorandum thehlutin, Union Home minister bakah India vice president leh Union Home secretary-te a copy pek an ni a. India sawrkar atangin thulh tumna emaw engmah thu lawmawm dawn a ni loa, ramri hung tur hian ngawrh takin inbuatsaihna a kal mek niin hriat a ni,’ an thuchhuak chuan a ti a. Hei vang hian prime minister leh union home minister lim hi hal an ni tih an sawi.