Ramri hung tumnaah ZPM sawrkar kan duhkhawp lo – MNF

Free Movement Regime tihtawp leh Myanmar nena inrina sawrkar laipuiin hung tuma hma ala meknaah ZPM sawrkar chetdan chu an duh khawp loa, BJP nena an puanhnuai thil lo lanchhuahnaah an ngai tih MNF party chuan an sawi.
Mizo National Front National Executive Committee (NEC) chu Ningani khan Aizawlah an president Zoramthanga kaihhruaiin an thukhawm a. MNF term hluia executive member-te term chu 2024 June 1 thleng pawhsei nise, an ti a. Mizoram politics lumlet dan hrang hrang thlir niin Lok Sabha inthlan tur boruak thlir a ni bawk.
MNF NEC thukhawm hian resolution pass in, MNF president Pu Zoramthanga kaihhruaina an ring tawk a, a thawhpui office bearers thlan tharte nen lungrual taka an kaihhruaina hnuaiah chak takin an kal zel dawn a. Ram, hnam leh sakhua a him zel theihna turin Pathian leh kan ram tan ti chung zelin huaisen takin an kal zel dawn tih a sawi.
MNF MLA thlantlin tharte an chhuangin, Assembly Budget Session-ah an mawhphurhna hlen tha an ti a; sawrkar khalhngil hna leh thudik tundin kawngah an hnathawh fakawm an ti takzet tih a sawi. MP pahnih (Lok Sabha & Rajya Sabha) ten Mizoram leh hnam aiawha an tih tur huaisen tak leh thahnemngai taka an thawk thin chu thlamuanthlak an tiin, an chhuang takzet tih sawi a ni.
Sawrkar laipuiin Myanmar nena inrinaa zalen taka inkalpawh theihna hmun phal china neih thin, Free Movement Regime a titawp chu a pawi an tiin, an dodal a. A thutlukna hi sut leh thuai turin an phut tih MNF NEC hian a sawi a. ‘Myanmar nena kan inrina sawrkar laipuiin hung tuma hma ala mek hi kan dodal tlat a, hemi kawnga ZPM sawrkar chetdan chu a duh khawp loin, BJP nena an puanhnuai thil lo lanchhuahnaah kan ngai a ni,’ a ti.
An chenna ram a buai avanga Mizoram bel – Myanmar, Bangladesh leh Manipur atanga rawn tlanlutte harsatna tawh mek an hrereng a, hun ralmuang an neih leh ngei an beisei pui a, chutihrualin an inpuia lo thleng an ni tih inhria a, thlamuang taka awm turin duhsakna an hlan tih a sawi a ni.