Ramria an inep hnuah Thai leh Cambodian sipaite inhnuk kir

Ramria an inep hnuah Thai leh Cambodian sipaite inhnuk kir
Ramri-a Cambodian sipai thah a nih hnua tharum thawhna a thlen deuh hnua Thai leh Cambodian sorkarten sipai an inchhawp belh hnuah a hmaa an awmna ngaiah ve ve sipaite hi an let leh dawn tih an puang.
Thai Defence Minister Phumtham Wechayachai chuan Inrinnia ram pahnihte an indawr theih nana an tih, Joint Boundary Committee an thutkhawm hnuah indawrna hmangin ramria inrem lohna an neih chu an tihfel theih ngei a beisei thu Pathianni khan a sawi.
Cambodian Foreign Minister Prak Sokhonn erawh chuan ramria an buaina chu International Court of Justice-a thlena chin fel ni se a duh thu a sawi thung.
“Thil awm dan, hman lai thil thlen tawh dan leh buaina ril tak hi pahnih inbiaka chin fel mai hi a kimchang tawh lo va, inremna daih rei thei pawh a ni lo,” tiin Sokhonn-a chuan a sawi.
Hetih lai hian Thailand chuan court thutlukna nghah kher a ngai an ti lo va, ram hnihte inbiakna hmanga chin fel mai tha an ti thung.
French awpna hnuaia an awm lai, kum 1907 khan France chuan Cambodia ram tur chin hi a rin a, hemi hnu atang hian ram pahnihte hi kum 100 chuang chu ramri rin fel lo takin an awm tawh.
Kum 2008 atang khan kum zabi 11-naa din Hindu temple inchuhin an lo inbei tawh thin a, a khât tawkin tharum thawhna pawh a thleng fo va, mi 28 vel thi an awm tawh.
Tun hnaia an buaina hi May 28-a chhuak kha niin Cambodian sipai pakhat chu Cambodia-a Preah Vihear province leh Thailand-a Ubon Ratchathani province-a ramri buai laia thah a nih atang khan a ni.
Thai leh Cambodian sipaite hian buaina sosang chu hmeh mih an duh ve ve a; mahse, Thailand-in heng lai vela sipai a dahte chu hnuk kir turin duh mah se Cambodia hian a awmtir lui zel.
Inrinni khan Thai sipaite chuan Cambodia nena ramria an inpawhna zawng zawng ‘khar leh hawn’ an thunun a, Thailand himna atana him lo leh tiderthawng thei niin an sawi.
Sorkarin a chhinchhiah dan chuan Thailand hian ramri km 817 an neiha a kânna 17 an thunun.
Pathianni zing lamah khan sipaite hian hmun 10-a heng hmun hawn hun chhung hi a titawi vak a ni.