Ramria insumdawnna hmuna awm tur officer-te tan siam

Land Customs Station Zokhawthar tihchangtlunna tura project hnuaia hna hrang hrang kal mek zinga pakhat, officer ho awmna tur quarters chu Commerce & Industries minister Dr R Lalthangliana chuan Inrinni khan a hawng.
Minister chuan ramdang nena kan insumdawn tawnna tura hmalakna kalzelah India rama Land Customs Station (LCS) 20 zingah Mizoramin pahnih – Zokhawthar leh Zorinpui a chang thei chu kan economy tih hmasawnna atan a ni tiin, Kawrpuichhuah lamah pawh hmalakna liantham tak kalpui mek a ni tih a sawi. Zokhawthar leh a chhehvel chu Mynamar nena insumdawn tawnna hmunpui ber ala ni chhunzawm zel dawn, tiin, SASCI kaltlangin cheng nuai 1500 hmanga hna thawh mek a ni a, he sumdawnna hmunpui tihlawhtling tur hian Zokhawthar leh a chhehvel mipui hma lakpuiah a sawm tih a sawi.
Champhai South bialtu MLA, minister TJ Lalnuntluanga chuan Mizoramin industry lian a la nei loa, state te leh la pachhe tak niin, chhiah lakkhawm tur a tam loa, state economy thanlen zelna turin ramdang nena insumdawn tawnna tih hmasawn a pawimawh tih a sawi a ni.
‘Infrastructure Development for Border Trade Facilitation at Zokhawthar Project’ hi Special Assistance to States under Capital Investment 2020- 2021 fund, nuai 1500 hmanga thawh a ni a. Lushai Engineers Ramhlun Aizawlin thawkin, 2022 April 20 khan hna an tan a, thla 24 chhunga thawh zawh tur a ni. Officers’ quarters hi cheng nuai 216 senga sak niin, 2BHK quarter paruk sak a ni.