Kawlkulhah HCC hawng thar

Kawlkulh North-a Health Clinic Centre chu Inrinni khan Lengteng bialtu MLA Dr L Thangmawia’n a hawng a, a MLA Fund-in health worker leh IV grade a rawihsak nghal.
Lengteng bial khua Health Sub-Centre awmlohna zawng zawngah sawrkarin Health Clinic Centre (HCC) a hawng kim ta tih Dr L Thangmawia hian a sawi a. Khawtlang hruaitute leh MLA dilna ngaipawimawha mipui mamawh em em HCC hawnsaktu Health department chungah bial mipui an lawm hle tih a sawi a ni.
Hriselna lama sawrkar hmalaknaa hmasawnna hrang hrang chu Lengteng bial pawh a zarzotu an ni, tiin, Kawlkulh damdawi inah hian x-ray khawl tha tak dah thar a nih bakah Isolation Ward sak a ni a, hun reiloteah Kawlkulh PHC-in building thar tha tak a neih theihna’n hma lak mek a ni, tih a sawi bawk.
HCC Kawlkulh North atan hian Kawlkulh PHC staff quarter hman lailawk a ni a, bungraw mamawhte MLA Fund hmanga lei an ni tawh. SASCI 2023- 2024 sum atangin HCC building thar sakna tur cheng nuai 15 ruahman a ni tawh a ni.