Ramsanga leh Remsiami te an langsar

On Apr 23, 2026 1 0

Mizoram State Sport Council (MSSC) chuan April ni 20, Thawhtan zan khan an Golden Jubilee an lawm a. R Dengthuama Hall a Golden Jubilee lawmnaah hian MSSC Award 2025-a sem a ni a. C Lalramsanga leh Lalremsiami Hmar ten chawimawina sang an dawng.
Badminton a chetha, India tana thawhhlawk tak C Lalramsanga MSSC Sportman of the year 2025-ah thlan a ni a. Trophy leh sumfai Rs. 1,50,000 a dawng. C Lalramsanga kuta mipa lama chawimawina sang a tluk luh laiin Hockey-a India player pawimawh Lalremsiami Hmar chu Sportwoman of the year 2025-ah thlan a ni a. Trophy leh sumfai Rs. 1,50,000 a dawng bawk.
MSSC Award 2025 semchhuah takah hian Badminton thiam, C Lalramsanga nena inkawp fuh thei tak H. Lalthazuala chu MSSC Most Promising Sportman of the year 2025-ah thlan a ni a, Trophy leh Rs. 80,000 a dawng a. Hmeichhe lamah badminton player Lalrempuii chu MSSC Most Promising Sportwoman of the year 2025-ah thlan a ni bawk a. Rempuii hian Trophy leh Rs. 80,000 a dawng. MSSC Award 2025 semchhuah takah Badminton player an langsar hle.
Badminton player ten mimal chawimawina an hui nual laiin team lamah Mizoram Amateur Taekwondo Association (MATA) an chetha ve thung. MATA hi MSSC Sport Team of the year 2025-ah thlan an ni a. Lawmman trophy leh Rs. 1,00,000 an dawng. Team tha bera thlan an nih theih nana thawhhlawk tak Lalinpuia, Teakwondo coach chu kum 2025 chhunga cocah tha berah thlan a ni a, Trophy leh Rs. 80,000 hlan a ni.
MSSC Award 2025 semchhuah takah hian Mizoram Chief Minister hlui leh Sport pawl hrang hranga tana thawhhlawk tak Lal Thanhawla chu MSSC Lifetime Achievement Award hlan a ni a. He award hian Trophy leh Rs. 1,00,000 a keng tel. All Mizoram Karate Association (AMKA) chu MSSC Best Performing Sport Association of the Year 2025-ah thlan an ni a, trophy leh Rs. 2,00,000 hlan an ni. David Lalremruata, Judoka chu MSSC Sportsperson of the year for Persons with Disabitlities Award hlan a ni a. David-a hian Trophy leh Rs. 1,00,000 a dawng. Janury 2026-a boral ta Dr Lalmuanpuia chu MSSC Sport Promoter of the year 2025-ah thlan a ni a, Trophy leh Rs. 50,000 hlan a ni.