Rangkachak kawr ‘Dubai Dress

Rangkachak kawr ‘Dubai Dress’
Sharjah-ah chuan rangkachak leh tlereuh lama sumdawng rualin an thil neih tha tha chhawp chhuakin, hawina lam apiangah rangkachak a ni ringawt mai. 56th Watch & Jewellery Middle East Show an nei a, ram hrang hrang 20 chuang atangin exhibitor 500 chuang an tel. He show-a mipui mit la ber pakhat chu rangkachak kawr ‘Dubai Dress’ an tih chu a ni a, he kawrdual hi kg 10,0812 a rit niin, 21-karat gold a siam a ni a, he rangkachak kawrfual hi AED 4.6 million (Rs 11,11,89,500 vel) man a ni a, Guinness World Records siamna khawp kawr a ni.
He kawr ‘Dubai Dress’ hi Al Romaizan Gold and Jewellery kutchhuak a ni a, Guinness World Records-in khawvela kawr rit ber leh khawvela rangkachak kawr hlu berah a puang. Al Romaizan Gold & Jewellery hian rangkachak thirsakawr te pawh an lo siam tawh.
‘Dubai Dress’ hian kawr leh pawnfen bakah gold crown leh thi, bengbeh leh kawnghren a keng tel a, gold crown ringawt pawh hi gram 398 a rit niin, rangkachak thi 810.60 a rit, rangkachak bengbeh gram 134,1 a rit leh rangkachak kawnghren gram 738.5 a rit te an ni.
Ni nga chhung awh tur he exihibition hi Expo Centre Sharjah-ah neih a ni a, exhibitor 500 chuang telin, designer 1800 chuang an tel bawk a, kumina exhibitor 68% te chu UAE pawn lam atanga tel an ni a, Middle East ram te bakah Italy, India, Turkey, USA, Russia, UK, Japan, China, Singapore, Hong Kong leh Malaysia atangin an awm nual a, Australia, Myanmar leh Pakistan atangin a vawi khat nan an tel ve ta bawk.