Rani Rampal chawl ve ta…

Rani Rampal chawl ve ta…
National team-a Lalremsiami kaihruai thintu leh Kolasib nula career-a hmun pawimawh tak luahtu Rani Rampal chuan Ningani khan hockey inelna a chawlhsan thu a puang ve ta.
Indian women’s hockey team captain hlui hi India rama hockey player hlawhtlingberte zinga pakhat ni phain, kum 16 zet ram tan khelmuala a khawsak hnuah a tiangkawm a tung hul ve dawn ta a, chuti chen chen lo chechhuak ve tawh a nih avangin chawl tura thutlukna siam chu a awlsam lo tih a sawichhuak nghe nghe.
Kum 29 mi hian Olympic-a India hmeichhe hockey team thlensanber hun hruai thlengin, kum 2021 Tokyo Games-ah khan medal dawng pha lo tawh chiahin palina a nihpui a, sub-junior women player-te hrual tura national coach nihna lam a buaipui chhoh tak bawk avangin inkhelh lam a bansan fel ve ta a ni.
Rani hi Haryana state-a khaw lian lo takah a pa, bawngtawlailir hnuktu thalbe atangin a lo chawrchhuak a, retheihna leh tihdanphung khirh tak atanga talchhuakin, hockey khelh a chawlhsan meuh chuan Indian hockey-a player zahawm leh hlawhtlingber pawl a ni chho thei.
A chawlh thu a puan hnuah Delhi-a amah bawrtu chanchinbumite hmaah a zinkawng leh hun tawn sawichhuakin, “Zinkawng pui tak a ni. Heti chen chena thui India tana ka khelh theih hi ka ring ngai lo. Naupan laia retheihnain a bawhbeh tlat ni chungin engemaw tak sukaw turin ka insawrbing ve tlat thin a, chu chu ram tana khelh hi a ni,” a ti.
He forward tha mi hian kum 2008 khan tleirawl tir kum 14 mi lek ni chungin a international debut a nghakchhuak a, a bultanna chu Olympic qualifiers niin, Ningania a chawlh thu a puan meuh chuan India tan game 254-ah goal 205 tehreng a vawlut tling!
Kum 2020 khan India rama infiammite chawimawina dawn theih sangber Major Dhyan Chand Khel Ratna Award dawngin, he mi kum vek hian civil mite chawimawina dawn thin zinga san lam indawta a palina Padma Shri a dawng zui leh bawk.
India sub-junior women team coach nihna bakah Hockey India League (HIL) duantharah Rani hian Haryana leh Punjab aiawhtu Soorma Hockey Club zawmin, women’s team mentor hna a thawk chho tel dawn bawk a ni.
Shahabad khaw tuiliak Rani hian retheihna inbawhbehtir mai loin Indian hockey-ah eng takin meichher a depkai a; tun dinhmun hruaithleng tura nawrtu lian a pa Ram Pal chuan nikhata cheng 80 aia tam a hlawh zawh loh avangin a fanu tana hockey stick pakhat lek leisat pawh a harsat thin!
Naupang a nih laiin a taksa tana kham khawp chawtha ei tur nei zo ta lo chu tum khat pawh district level coach-in a hnuaia zir tur thlannaah a hnawl tawh a, mahse, chu chuan a tiangkawm ke ner sung hmanga ‘practice’ a thulhtir zo lo a, Indian hockey vanzawla arsi eng berte zinga lang pha tur hian a kawng zawh a tluang purh lo.
Pawn lama a harsatna piahlamah chhungkaw inkaihhruina khirh tak atanga zichhuak a nih avangin a hockey zinkawngah hian thlawp a hlawh famkim diak diak bik lo a, mahse, hmala m a pan tang tang a, kum ruk mi lek ni chungin an khaw team a zawm a, kum 14 a tlin meuh chuan India tana khel thei naupang ber a rawn ni chho ta a ni.
A chhungte zingah a hockey khelh dodaltu awm bawk mah se Rani hian a chhungte chungah lawmthu sawiin, a career-a thlawptu lian ni chho ta zel a pa chungah a bik takin a lawm a, a pa chu rethei mah se rilru lamah a hausa tlat tih sawiin, “Inkhel tura hun remchang min siamsaktu leh ka hming chawisangtu a ni.”
A captain-na hnuaiah Indian women’s team chuan London khuaah khan 2018 World Cup quarter-final thlengin, 2018 Asian Games-ah silver medal an la bawk.
A ho vek hian 2019 FIH Series Finals-ah an champion a; a zawna Olympic vawihnih Indian team an inlan theihna kawngah a thawhhlawkberte zinga mi a ni.
Rani Rampal hian thangthar zawkte tana kawl a en zel thu sawiin, “Women’s hockey-ah change tam tak hmuh tur a lo awm ta a, women’s hockey tana league khelh tur hial lo awm tate hi kan suangtuah phak ngai reng reng loh a ni. Hmeichhe naupangte hian tunah chuan inphochhuahna hun remchang bakah sum lama puihna tha zawk an dawng thei tawh ang,” tiin an hun lai leh tun inthlauhna a tarlang tel.
Mimal leh team zawna hlawhtlinnain a bawm khah luk ni mah se Olympic podium a lawnkai zo ve ta lo khan a awm a tinuam tak tak thei ngai lo a, hmachhawp nei tlata inngai chungin a chawl dawn ta a, hei vang hian a hnu lama mite’n Olympic medal engemawber tal an hlawhchhuah ngei theihna’n a theihtawp chhuah a tum tih chawlh thu a puan rualin a chhamchhuak tel.