Ranking hniam zawk laka tlawm India!

Ranking hniam zawk laka tlawm India!
Thawhlehni zan khan 2027 AFC Asian Cup Qualifier away match-ah India chu Fifa world ranking-a an aia hniam zawk Hong Kong lakah sikhat faiin a tlawm a, Indian forward-te’n an hun tha neih goal-a an chantir zo lo kha an tuar a ni.
Indian football-in hniam lam a pan zel a, senior men’s team khelh dan enin tumruhna leh huaisenna an tlachham tih a hriat a, an finishing skill a ropui lo a, game fight tak tak tura an inpekna leh thathona a zuai tih a hmuh theih a, team nem zawk tura ngaih Hong Kong lakah pawh an tlawm zui leh ta a ni.
Mualneitu Hong Kong chakna goal awmchhun kha injury time penalty atanga Stefan Pereira chhuihluh a ni.
India goal-veng Vishal Kaith chuan ball lo kal hmunhima namchhuah tumin goalline a chhuahsan a, mahse, chu ball zawng ve bawk Michael Udebuluzor lakah a foul a, referee-in mikhual team chu penalty a chawitir a; spot kick chhuih tura penchhuak Pereira chuan dangerous foul avanga yellow card hmanga thunun tawk Kaith-a ding lamah chhuihin hun tawp dawnah Hong Kong chakna goal a thun.
India tan Saudi Arabia rama Asian Cup khelh beiseina a chau zel a; Fifa ranking thar tarchhuah turah pawh No. 133-na luah thla tura ngaih niin, Hong Kong ranking point hmuh erawh a pung thung ang.
All India Football Federation (AIFF) leh a hnuaia chhawrte inkar boruak a chhe fo a, head coach kalchhuak ta Igor Stimac-a hnuah India team dinhmun a tlahniam zel a, chuti ang boruakah chuan tlarhma lama India innghahna pui ber ni rei tak Sunil Chhetri chuan international football a chawlhsan zui ta bawk nen Blue Tigers dinhmun a chau sawt hle.
Head coach thar Manolo Marquez chuan international football atanga kum khat zet kal bo tawh Chhetri chu India team-ah a thlemkir leh thei hram a, mahse, India captain hlun hnuaiah pawh eng an ang zui tak tak thei chuang lo.
Sunil Chhetri chawlh hnua goal khung kawnga India innghahna ni chho thei thuak tura beisei Lallianzuala Chhangte lahin tlarhma lama hmunruak chu a luah zo chiah rih si lo a, India team buaina hi a ril ru riau rih!
ISL side FC Goa coach ni chunga Stimac thlak tura an sengluh Manolo hmalam hun pawh a chiang lo mek a, national team-ah hian engtia rei nge a cham dawn hriat theih a ni rih lo.
Thawhlehni Kai Tak Stadium inkhelah pawh a naute goal thun thei lo lutuk avangin touchline lama Manolo lunghnur hmel hmuh tur a awm chamchi a, vawi hnih thum ngawt ‘clear chance’ nei chunga a naute’n goal an khung thei tlat lo kha a manganthlak duh ve bawkin a rinawm!
Thawhlehni inkhel tan hma lawkin India manager Manolo chuan starting X atangin veteran striker Chhetri a lachhuak a; India goal bawh a nat phah sawt pawhin a hriat hran lo!
Stadium chhungah home supporter-te thawm a tha a, mualneitu team lamin ball pawh an chang tam zawk ngei a, chuti chungin India khan first half-ah chance an siamchhuak nual a, mahse, tunhnai chhoa an bualna ngai bawk finishing fuh thei lo an tuar leh a, minute 45 hmasa zawk chhungin goal an thun zo lo.
Half-time break hmaa India goal thun teuh ber chu minute 35-a Ashique Kuruniyan hun tha hmuh kha niin, hnai set sawt atangin goal ban sirah a petchhuak a, veilam sir atanga ball tuihnai zet chhawpsaktu Liston Colaco tan pawh khan hrilhhaithlak duh tak tur a ni!
Colaco ngei pawh hian powerful long-ranger thawn phei bawk mah se Hong Kong keeper a paltlang zo bik lo.
Half time a hnai zel a, mualneitu team lam an inringtawk tulh tulh tih an khelh dan atangin a hmuh theih a; thawk khat lai phei kha chuan free-kick atanga hmahruai theihna hun remchang an hmu a, mahse, goal-mouth taka tan khawh Asish Rai khan a hun takah ball hlauhawm chang thei tur chu hmunhim lamah a thawnchhuak hman hlauh a, chuti chu ni lo se Indian keeper Vishal Kaith-a pel tawh goal hmang khan Hong Kong-in chawlhlawk hmain hma an hruai ngei ang.
Second half tir lamah chawlhlawk hmaa thelh tawh Kuruniyan bawk khan ‘chance’ dang nei lehin, tah pawh hian a hun tha neih goal-ah a chantir zo leh lo.
A hnu lawkah coach Marquez chuan Kuruniyan leh Brandon Fernandes lachhuakin, India all-time highest goal-scorer Chhetri leh Naorem Singh a luhtir a, ke thar pahnih pawh hian India tlawm tur an chhan zo bik lo.
Hun tawp hnaih tawh minute 81-ah India lamin chance tha tak hmu lehin, Lallianzuala Chhangte chuan Hong Kong box chhungah pui taka ball lain Chhetri tan a chhawpsak a, mahse, veteran striker hian Mizo player ball pek a nang hman tlat lo!
Kumin March thla khan India hian Asian Cup qualifying match an khelh hmasakberah goal awm loin thenawm Bangladesh an inhnehtawkpui ringawt tawh a, tunah point thlawkchhuak zo lo zawngin an khawsa leh a, game hnih atanga point khat chauh hmuin an group-a hniam ber an ni mek a, team pali awmna an pool atanga a sangber chauh final round khel tur an nih avangin India beiseina hi a hniam hle tawh a ni.
Beiseina nei leh thei tur chuan khelh hmabak pali an la neihah India hi an chak vek a ngai tawh dawn a, chu erawh an hawiher enin a beiseiawm chiah si lo!