Rannung thahna hlo khuahkhirh an ngen

Mizoramah thlai leh thei hrisel zawk kan ei theih nan rannung thahna hlo leh hlo tur lam chi khuahkhirh turin environmental NGO pakhat chuan Agriculture minister hnenah ziakin ngenna an thehlut.
Centre for Environment and Social Justice (CESJ) Mizoram-in Agriculture minister hnena an thlenah hian, thlai leh thei kan leiin damdawi rim nam leh rannung thahna hlo (pesticides) hnuhma a tel nia hriatna a awm a. Heng hlo leh thlai/thei vawnthatna (preservants – chlorine hydrogen peroxide, trisodium phosphate, sulphites adt) hian mihring hriselna a nghawng a. Cancer, khawsik, lu na, hritlang awm na/ hrawk leh hnar za, vun natna, nerve tha lo, ruhchuktuah na, asthma leh sinus adt a thlen thin tih mithiamte zirna atangin hmuh chhuah a ni tih a sawi.
Mizoramah hlo tur kan hmang nasa hle tih sawiin, ‘Mahni lo leh huan hnim leh kawngkam hnim suatnan hmun tinah hman a ni a. Nungcha hrai nan hman thin a ni bawk. Lui tui ringa nung Mizote tan thil rapthlak tak a ni,’ a ti.
Hnam anga kan hrisel lohna, natna hrang hrang, kan vei nasat chhan pakhat pawh hlo tur leh rannung thahna hlo leh thlai leh thei vawnthat nana hlo leh damdawi kan hman uar vang a nih a rinawm tih CESJ hian sawiin, ramdang leh state danga tanga lo lutah nge, tualchhunga chingtuten rannung thahna hlo leh hlo tur hman vang tih hriat a nih loh vangin khuahkhirh a tul tih an sawi.
State dang atanga thlai leh theih lakluhte a hrisel em, damdawi hmanga sawngbawl a ni em tih endikna – Quarantine checkgate ‘mini lab’ chu Vairengte, Bairabi leh Zokhawthara dah; thlai leh thei bawmtu rannung thahna hlo, hlo tur leh thlai vawnthatna damdawi hriselna leh environment-ah engti angin nge nghawng thalo a neih tih zirchian ngei nise an duh thu an thlen bawk.