Ranvulh chhiarpui nei dawn

Kuminah India ram pumah ranvulh ho chhiarpui neih a ni dawn a. Mizoramah pawh neih tur niin, chhiarpui nei turte hi September 19 & 20 khan Aizawlah an hriat tur zirtir an ni.
Mizoram district pasarih – Mamit, Kolasib, Aizawl, Champhai, Khawzawl, Saitual leh Serchhipa enumerator-te tan Livestock Census 2024 training hi neiin, AH & Vety joint director Dr F Lalramhluna’n a hawng.
Livestock Census hi kum 1919 atang khan India ramah neih tan niin, kum 5 dan zela neih a ni. Mizoramah kum 1972 atanga neih tan niin, national level-a Livestock Census vawi 9-na neih kum a ni. Kumin hian 21st Livestock Census neih tur niin September thla chhungin training zawh vek tur a ni a, October atanga census neih tan tum a ni.
Livestock Census-ah hian ran chi (species) hrang hrang – bawng, lawi, vawk, kel, beram, sakawr, ui, sai, sazupui, ar, varak leh arva chi dang vulhte chhiar vek tur a ni a. Enumerator-te in tin leh office, dawr leh ran vulhna hmun zawng zawngah kal chhuakin ranvulh hi chhiar vek tur a ni.
Census hi India sawrkar rrogramme niin, census hnuhnung bera a titha pathum zingah Mizoram chu a tel pha a ni. Kumin atangin data rintlak leh dik neih theihna turin livestock census data hi mobile app hmangin lakkhawm tura duan a ni.
Ranvulh hian India ram economy-ah pawimawhna tak neiin, a thawhhlawk em em a. Chhungkaw sang tam takin eizawn nan hmangin, chaw tha kan neih theihna bulpui a ni. Hei vang hian India sawrkar chuan livestock sector lama hmasawnna tur scheme hrang hrang duangin a kalpui mek a, chutiang scheme leh programme tihhlawhtlinna atana ruahmanna siamna’n census data hi hman thin a ni.
Training thawhhnihna hi September 25&26 hian Lungleiah district 4 – Lunglei, Hnahthial, Lawngtlai leh Siaha tan neih a ni ang.