Rate dik lo…

Legal Metrology, Siaha chuan tun hnai khan Siaha khaw chhunga dawrkai-te buhfai zawrh an endik a, buhfai bag pawn lama a rih zawng inziak lo leh buk dik lo dawrkai 16 atangin bag 153 an man a. Legal Metrology-te hian nikum lamah hetiang thil dik lo hi hmu chhuak tawhin dawrkaite chu buhfai bag pawn lama a rih zawng inziak lo chu zuar tawh lo turin lehkhain an hriattir a; mahse, hetiang hian man chhuah tur an la awm cheu tihna a ni.
Legal Metrology lam an fakawm hle. An hna leh mawhphurhna an hria; chumi piah lamah, mipui dikna leh chanvo humhalhin, mipui himna tur an ngaihtuah hle tih a hriat a, a lawmawm hle a ni.
Rate dik lo hman chungchangah hian, taxi fare hi a langsar hle bawk. State Transport Authority (STA) approved rate a awm a, Taxi fare book pawh siam thlap a ni a, chu chu taxi service (driver) ten an ‘kawl vek tur a ni’ tih dan pawh a awm. Mahse, Aizawl taxi service zingah hian taxi fare book kawl thlap leh, chumi anga tlan thlap thlap thei hi chu sawi tur an tam lo khawp ang. Tun hnai mai khan, thingtlang khua atanga Aizawla lo kal, cancer natna enkawl mek nu pakhat chuan, Chanmari leh Vaivakawn (via Chanmari West) inkarah taxi driver-in taxi fare Rs 200 a dil tih a sawi a. Mikhual chinchang hre lo bum tur zawng reng renga hmanhlel hi taxi driver zingah an awm thin nia sawi a ni.
Taxi fare/rate dik lo chungchangah hian, STA pawhin taxi driver-te leh mipuite hriat tur thuchhuah hi a siam ve bawk a, mahse hei hian zawm a hlawh vak lo. Hemi chungchangah hian, mipui (consumer) lam hian kan dikna leh chanvo humhalh tura taimak kan chhuah hi a hun takzet tawh a. Social media lama thinrimna hrikthlak emaw, phunnawi emaw ringawt hian engmah a siam tha pha lo. Rate dik lo, fare dik lo, buk dik lo etc. hi consumer-ten hre reng chunga an sawisel ngam loh emaw, thuneitute hnena an thlen loh hian, sumdawng (dawrkai/taxi service etc.) te an hluhlan phah sauh a, a tuartu chu consumer-te bawk kan ni. Consumer-te kan taimak hun hunah hetiang thil dik lo hi chu a reh chhawm ve maiin a rinawm.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More