Ration buhfaia ‘fir’ hnuah March-ah qtls. 7566 hum

Ration buhfaia ‘fir’ hnuah
March-ah qtls. 7566 hum
Ration buhfai pekchhuah dan leh buk dik taka kalpui a nih hnu ah Mizoram sawrkarin buhfai quintal 7566 a hum thei a, hei hi sumfaia chhut chuan cheng vaibelchhe 2.2 a ni tih ZPM chuan an sawi.
ZPM Gen. Hqrs. thuchhuak chuan, Supply minister leh sawrkar official-te hmalaknaa buhfai bo thlau tur venna kalzelah kudam lama thawkte leh retailer-ten buhfai buk dik taka an pek chhuah tak avangin March 2025 khan quintal 7566.61 sawrkarin a hum thei a, a sumfai chuan a hlutna hi vaibelchhe 2.2 chuang a ni tih a sawi.
Thla khatah mipui khul tur buhfai quintal 97439.63 mamawh thin a ni a, March 2025-a buhfai hum quintal 7566.61 a awm theih avangin April quota ngaihtuah belh ngai chu quintal 89873.02 ah a tla hniam thei ta tih sawiin, hei hi ram siamthatna kawnga hmasawnna ropui takah an ngai a, a changtu minister B Lalchhanzova leh sawrkar official-te thawhrimna an chhuang hle tih a sawi a ni.
Thlatin buhfai quintal 7566 kal ral tur sawrkarin a hum zel theih chuan kumkhatah buhfai qtl. 90000 chuang a tling thei dawn a, a sum anga chhut chuan vbch. 30 vel kumkhat chhungin sawrkar sum kalral tur a veng dawn tih ZPM thuchhuah hian sawiin, ‘Hei hian a man toa buhfai kan lei thin kha a ti tlahniam dawn a, state pawna buhfai leina atana sawrkar sum hman pawh a tlakhniam phah dawn bakah National Food Security Act hnuaia card eng leh card pawlah mi nuai khat thun theih an ni dawn a ni,’ a ti.
Hetiang taka sawrkarin mipui tana ngaihtuahna a sen avang hian kudam lama thawktute leh retailer-te pawhin buk dik taka buhfai pe chhuak chhunzawm zel turin ZPM Gen. Hqrs chuan a ngen tih a sawi.