Ration card sen siam dawn

Ration card sen siam dawn
Ration card pawl leh a enga awm tur chi, hemi huanga leng lo tan Mizoram sawrkar chuan ‘special ration package’ a siam dawn a, card sen a ni dawn tih sawi a ni.
He thu hi Zirtawpni khan chief minister Lalduhoma leh Supply minister B Lalchhanzova ten an sawi ve ve a. National Livestock Mission leh Bana Kaih Scheme kalkawp tir tum a hawnnaah chief minister chuan, ration card thliarfel mekah card eng leh pawla lut thei si lo, card var nei rethei harsa si tan special ration card – card sen siam a ni dawn tih a sawi.
Card sen hi chhungkaw 2500 tan ruahman niin, hei hian mihring nuai khat a huam dawn tih a sawi a. Chuta lut tur chu a bialtu DCSO-te thuneihna pek an ni tih a sawi. Hemi chungchangah hian NGO-te puihna an mamawh hle tih sawiin, a bikin hemi atan hian village council puihna a ngai dawn tih a sawi a ni.
Zirtawpnia Serchhipa hun an hmannaah FCS&CA minister pawhin ration card ennawn hna thawh mek a ni a, a buaipuitute lam atang chuan na deuh taka hma lak an tum tih a sawi. Ration card varin buhfai kg. khat Rs.30-a an leina turah amah chu a mawhphurtu ber a ni tih a sawi bawk.
Card pawl leh card enga awm awm tak, mah se, a awm thei chin bitukin a pelh tawh si avanga leng ta lo engemawzat an la awm avangin, mi nuai khat tan kg khat Rs.20 a ration buhfai an khul theihna tur special ration package buatsaih a ni, tiin, ration card sen hman a ni dawn tih a sawi a ni.