Native American, rawlthar kum 17 mi, Reuben Looks Twice Jr. sam chu 161 cm (feet 5 leh inches 3.3) a sei niin, Guinness World Records, rawlthar zinga sam sei ber record a siam.
Rapid City, Dakota a cheng Reuben hian mipa naupang kum hnih mi a nih atangin a lu a la met leh miah lo a, lumehna khawl (hair clippers) a hlauh tlat avangin a chhungte a naupan laiin a sam an zuah sak a, chu chu a lo upat ve tak deuh hnuah a chhunzawm ta zel a, tunah chuan Guinness World Records a siam pui ta a ni.
A hmaa hetiang record chu Indian rawlthar, Sisakeep Singh Chahal siam niin, nikum khan a sam sei zawng an tehin 146 cm (feet 4 leh inches 9.5) a sei niin, record a siam a, Reuben hian record thar a rawn siam ta a ni.
A naupan laia a sam zuah chu a upat tak deuh hnuah pawh an hnam tihdan zuiin a sam hi a zuah chhunzawm ta zel a, Reuben chuan, “Lakota mite hian sam kan zuah nasa a, kan Nagi (thlarau lam thil) peng pakhat a ni a. Ka nihna a ni. Kan chhungkua leh Lakota hnam ai ka awhna a nih avangin chhuanawm ka ti viau a ni,” a ti.
Reuben sam hi sei viau mah se tukin a su ziah tho a, shampoo leh conditioner hmangin, minute 20 vel lu suk nan a hmang a, a tihro leh kuihmam nan leh phiar nan minute 10 vel hun a hmang bawk thin. Reuben hian lumeh tumna a nei rih lo niin a sawi a, tuna a tum danah chuan a damchhung chu zuah char char a tum zawk a ni.
Guinness World Records hian mipa zinga sam sei ber record holder an nei lo a, Reuben hian kum 18 a tlin hunah he record thar hi a siam leh thei dawn a ni. Chhinchhiah theih zinga mipa zinga zuah sei bera an sawi thin chu Tirudaduturai monastery, Madras a Swami Pandarasannadhi niin, 1949-a an record dan chuan a sam hi feet 26 a sei a ni.
Rawlthar sam sei ber
Get real time updates directly on you device, subscribe now.